Ол Берік Беков. Бапкер. Қаншама қарадомалақтың қолына былғары қолғап кигізіп, аудан спортының қарқынды дамуына өз үлесін қосып жүр. Ол 90 жылдық тарихы бар, еліміздегі алғашқы жоғары оқу орны саналатын Абай атындағы Қазақ Ұлттық педагогикалық университетін тәмамдаған. Бір ерекшелігі өзгелер секілді бала кезінен бокспен айналыспаған. Небәрі 4 жылдық оқу кезінде дене шынықтыру және спорт мамандығын меңгеріп жүоген ол, қосымша спорттың осы түрімен машықтанып, бапкер атанған.

Жас ұстаз қазіргі таңда Т.Көмекбаев атындағы №250 мектеп-лицейінде еңбек етеді. Шәкірттерін бокс үйірмесіне баулиды. Еңбек жолын 2015 жылы бастаған Б.Ерімұлы жиырмадан астам жас спортшыны тәрбиелеуде. Бүгінде бірнеше шәкірті жетістікке жеткен. Олардың қатарында Арсен Болатов, Абдулхамит Жеткерген, Әділет Камалханов, Мағжан Қуанышбек, Асылжан Жолдасбаев мен Тілеухан Молдырмановтар бар. "Ұстаздан шәкірт озар" демекші жас бапкердің Ақниет Камалханов, Серікболсын Жолдасбаев пен Андрей Яшков атты шәкірттері бұл күнде "Спорт шеберіне үміткер" атағын иемденіп, ұстаздың мерейін өсірді. Берік Бековтің өзі де марапаттан құр алақан емес. Ол жақында ғана облыстық чемпионаттан жүлделі ІІІ орынды иемденіп, жеңіс төрінен табылды.

Ақжар ауылының тумасы, болашағынан үміті көп бапкер, бір отбасының қорғаушысы, Айжан есімді ақ халаттының жары, кішкентай қызғалдақтың әкесі. "Болашақта ұлдарым болса міндетті түрде спортқа баулимын" дейді кейіпкеріміз.