Жоба сыйлаған«тәттілер»
Тың идеясы бар жастар талап қылып, батыл қадам жасауда. Өңірдегі кәсіпкердің де дені – жастар. Әлеуметтік желіде жобасы қолдау тапқандардың парақшасы бүгінде белсенді. Талай жастың идеясын жүзеге асырған «Zhas project» жобасы сыйлаған «тәттілер» де кәсібінен береке тауып отыр. Солардың бірі – торт әзірлеуші Айжанар Серікқызы.
Ол тәттінің түр-түрін тапсырыспен жасайды. Мерекелік дастарқанның сәнін ашары Инстаграм парақшасындағы есеп-суреттерінен анық байқалады. Арасында шеберлік сыныбын ұйымдастыратын ол жобаға қатысқанына еш өкінбейтінін жеткізді.
– «Zhas Project» жобасын естіген бойда бірлесіп жұмыс істеуге кірістік. Ауданның өзінде түрлі-түрлі креативті идеялар ұсынылды. Солардың ішінен топ жарып, грант иегері атанғанымызға қуанамыз. Себебі біздің жоба – мүмкіндігі шектеулі жандарға, жетім, тұрмысы төмен отбасынан шыққан жастарға арналды. Мақсатымыз – аз да болса олардың жүзіне күлкі үйіру, тәттілер жасауды үйрету. Жоба аяқталса да бастапқы қарқынымыз тоқтаған емес, – дейді ол.
Жас кәсіпкер жобасына «Тәп-тәтті» аспаздық орталығы деген атау берген. Мұнда әлеуметтік осал топтағы жандарға тәттілер әзірлеуді үйретеді. Қолына сертификат ұстатады. «Нан бар жерде – ән бар» демекші, үйренбекке жиналатын жандардың да басы осында қосылып тұрады.
Мақсаты айқын жас маман «Сүтті қыз», «Вупи пай», «Қызыл барқыт», «Капкейк», «Миндаль», «Малина», «Сникерс», «Рафаелло», «Орео» секілді тәттілерді әзірлейді. Бағасы да торт сапасына сай қойылған. Иә, ауызға салса еритін торт Айжанардың қолынан күнде туындайтын дүние. Мемлекет тарапынан қолдауға ие болған жас кәсіпкер бизнесін алдағы уақытта кеңейтуді көздейді. Енді ғана кәсібін бастаған жастың кәсібінен нәсібін көріп, жобасын одан әрі дамытатынына сенім мол.
Айнұр ӘЛИ
