Әрине, ауылда тойхана жоқ. Десе де аудан орталығындағы біріне баруы үшін осы сән салонына бас сұғады. Мұнда қыз­меттің барлық түрі бар. Мәселен, шаш сәндеу, бояу, қию, бет әрлеудің барлық түрі, сондай-ақ тырнақ сәндеу де бар. Ал бар қызметті кәсіпкердің өзі-ақ атқарады. «Басты көмекшім – екінші анам» дейді ол бізбен әңгімесінде.

– Ауылда бос отқанша кәсіп ашайын деген ой келді. Әрине, ең алдымен қолдау білдірген жақындарыма алғысым шексіз. «А студио» сән салонынан, Айзада, Айгерім Асқарбектерден тәжірибемді шыңдадым. Бас­та тұтынушыларды үйден қа­былдап жүрдім. Уақыт өте жоба әзірлеп, 500 мың теңге көлемінде қайтарымсыз несиеге қол жеткіздім. Барлық құрал-жабдығымды алып, міне жұмысымды бастап та кеттім, – дейді Айдана Жүнісова.

Сән салонындағы қызмет бағасы қол жетімді. Мұнда ат басын бұрушылар қатары да аз емес. Ауыл тірлігімен біте қайнасқан екі баланың анасы барлығына да үлгеріп отыр. Қалай деймісіз? 

– Айдананың бұл жұмысқа икемі барын байқадық. Өзі құр­быларының шашын сәндей­тін. Осыны шыңдағысы келді. Оқуын оқыды. Қазір шүкір, барлығына үлгеріп жүр. Ендігі осы салаға тағы қызмет түрін қосатын ниеті бар, – дейді кәсіпкердің анасы.

Үй жанындағы шағын сарайдан кәсібін бастаған жас келіннің алға қойған мақсаты да айқын.

– Кәсіппен айналысу кез кел­геннің қолынан келеді. Бас­тысы ниеті болса болғаны. Жастарға кәсіп ашуға, сол арқылы өзін-өзі қамтуға кеңес беремін. Нарықтық қоғам «алма піс, аузыма түс» деп жатуды көтермейді. Бұл мен армандаған ойдың бірінші сатысы. Ендігі мақсат – осы кәсіпті одан әрі дамыту, үлкейту. Ауыл жастарын жұмыспен қамту, – дейді жас кәсіпкер.

Ауылдағы жаңа, жалғыз сән салоны тұрғындарға барынша қызмет көрсетпек. Өйткені, сән мен салтанат құрған жерде кәсіп те дөңгелейді.