Былтыр сот не тындырды?
Ел ішіндегі шағын дау дамайды, аз-кем арыз шағымды жоюды, сот жұмысын болымсыз істерден арылтуда медиацияның көп көмегі тиюде. Бұл жайында аудандық сот төрағасы Дархан Кентбаев өткен жылды қорытындылау жиынында мәлім етті.
Төрағаның айтуынша, соңғы жылдарда ауданда бас бостандығынан айыру жазасы тағайындалмаған. Сондай-ақ сотқа түсер арыз-шағым да азайған.
Былтыр аудандық соттың өндірісіне барлығы 79 адамға қатысты 59 қылмыстық іс түсіп, 71 адамға қатысты 54 қылмыстық іс аяқталған. Ал 24 қылмыстық іс бойынша 27 адамға үкім шығарылып, 22 қылмыстық іс бойынша 30 адамға қатысты қылмыстық іс өндірістен тоқтатылса, 13 қылмыстық іс медиация тәртібімен шешілген.
Азаматтық іс бойынша 76 арызға сот бұйрығы шығып, 463 іс бойынша шешім шығарылған. 59 азаматтық іс жүргізу тоқтатылып, барлығы аудандық сотта 637 азаматтық іс қаралып аяқталған. Аудандық сотта 2018 жылдың 12 айында барлығы 441 әкімшілік іс қаралып, 43 іс медиация тәртібімен тоқтатылып, тараптардың медиаторға жүгіну саны 13 іске көбейген.
Шара соңында сот төрағасы БАҚ өкілдерінің тарапынан сот әділдігін жүзеге асыру бойынша туындаған өзге де сұрақтарға жауап беріп, азаматтардың сот жүйесіне сенімін арттыру бағытында жүргізілетінін айтты.
Ерсін Әбләкиев,
«Қармақшы таңы».
