ҚАУІПСІЗДІККЕ ҚАМ ЖАСАЛДЫ
Қыс айында су тасқынының алдын алу үшін жылда қауіпсіздік шаралары қолға алынып, қарқынды жұмыстар жүргізіледі. Себебі өзен мен су тоспаларында мұз ұстасып, көктемде сең жүру басталады. Салдарынан елді мекендерді су басу қаупі орын алуы әбден мүмкін.
Аудан әкімінің тапсырмасына сәйкес аудан әкімінің орынбасары Айдын Әнуар тиісті сала қызметкерлерімен бірге су тасқынының алдын алу мақсатында «Қараөзек» арнасына мониторинг жұмыстарын жүргізді. «Қожатай» су тоспасы арқылы «Жұмағұл» каналымен «Қаракөл» көліне су жеткізу және жоғарыдан келген суды тиімді пайдалану мәселесі бойынша сала мамандарына нақты тапсырмалар берді. Сондай-ақ жауапты мамандарға мониторинг жұмыстарын жүргізіп, бақылауды күшейтуді жүктеді.
Осы орайда, барша аудан тұрғындары мен «Сырдария» өзені және «Қараөзек» арнасы бойында мал шаруашылығымен айналысатын кәсіпкерлерге қыс-көктем мезгілдерінде су тасқыны қаупі кезінде жайылымдағы ауыл шаруашылығы жануарларын қауіпсіз жерге көшіру қажеттігін ескертеді.
«ҚТ» ақпарат
