БӘРІ БАЛАЛАР ҮШІН
Ақтөбе ауылындағы №109 орта мектеп жанынан ашылған «Балдырған» жазғы тынығу лагері ашылды. Балалардың жазғы демалыс күндерін тиімді өткізуді мақсат еткен шараға ауыл әкімі, лагерь басшысы, ата-аналар мен мұғалімдер қатысты.
Тынығу лагерінде 25 баладан екі ауысым бойынша елу бүлдіршін тынығады. Демалыс орнында алты тәрбиеші, тәлімгер, музыкант, екі дене тәрбиесі пәнінің мұғалімі жұмыс істейді.
– Әрбір бүлдіршін – елдің болашағы. Сол себепті мемлекет тарапынан беріліп жатқан сан түрлі қолдаудың нәтижесінде осындай жағдай жасау – біздің парызымыз. «Ұлым» деген ел болғанда, айдарынан жел есіп, «елім» деген ұлдарымыз қалай болмасын?! Балғындардың сапалы білім алып, жазғы уақытын тиімді пайдалануымыз керек, – деді ауыл әкімі О.Мұнарбаев.
Жазғы тынығу лагері барлық қажеттіліктермен қамтамасыз етілген. Лагерь басшысы Қ.Сәденов балалар тек демалып қана емес, бойдағы өнерін шыңдап, бір-бірімен тәжірибе алмасатынын да жеткізді.
– Демалыс орнында бала тек тамақтанып, ұйықтап қана қайтпайды. Әрбір күн бір-біріне ұқсамайтын өзгеше болу керек. Түрлі шаралар ұйымдастырамыз. Әнші де, биші де, қолөнерші де бар мұнда. Өзара сайыс ұйымдастырып, уақытты көңілді өткізуіне жағдай жасаймыз, – деді ол.
«ҚТ» ақпарат.
