Табиғат – адамзаттың тал бесігі. Солай бола тұра, табиғатқа пайдаланумен қатар келтіріліп жатқан зиян да аз емес. Қарапайым қоқысты тастай отырып, біз табиғатқа орасан зиян келтіретінімізді бірде байқасақ, бірде мүлдем ескермей жатамыз. Күні бүгінге дейін адамзат игілігі үшін жасалып отырған қаншама істің түбінде бір кесірі табиғатқа келтірер зиянының ұшан-теңіз екенін ұмытпауымыз керек. Осының бәріне қоршаған орта үнсіз қарап, бізге пана болуын доғарған емес. Адамзаттың қолдануы үшін барынша табиғи нәрселерді ойлап табу – табиғаттың адамзаттан күтетін үміті. Біз онымен тығыз байланыста өмір сүреміз. Сондықтан табиғатқа зиян келтірмей, оны көркейтуге үлес қосуымыз керек. «Бір тал кессең, он тал ек» деп дана халқымыз айтқандай, айналаны көркейту, оған зиян келтірмеу – адамзат алдында тұрған ұлы міндет.

Табиғат тамашасының бір түрі орман-тоғай, аң-құстар. Олардың да тағдыры алаңдатып қана қоймай, дабыл қағу белгісіне де ие. Себеп біреу ғана. Үнемі қолданыс пен қажеттілікке ие болғандықтан, орман-тоғайға немесе аң-құстарға залал келтірушілер тарапынан тиетін соққыдан кейбір түрлері жойылып, ал кейбірі азайып қалып жатады. Олардың қайта көбеюі мен табиғат қорында орны сақталуы үшін браконьерлік топтарға тосқауыл болып, ескерту шараларын ұйымдастырып отыру бақылауға алынады. Мекеме орманшылары осы бағытта орман қоры жерлерінде орман және аң аулау заңдылықтарының бұзылуының алдын алу, орман және дала өрттерін болдырмау, оны жою мақсатында жұмыс жасап келеді. Заң бұзушылықтар анықталған жағдайда Қазақстан Республикасының Әкімшілік құқықбұзушылық туралы кодексінде көрсетілген баптар (381-1, 382, 367, 370, 372, 138-баптар) бойынша тиісті шаралар қолданылады.

Мінекей табиғат тамашаларының күн­делікті көзімізге көрініп жүргенімен, болашағына шабылып жатқан балтаның зияны көп. Табиғатты аялау, оны қадірлеп өз балаңдай мәпелеу – әрбір адам үшін ұлы міндет. Табиғи байлығымыз бен сарқылмас қазынамыздың қадіріне жетіп, оның тіршілік тоқтағанша көрікті, жайнаған әсем келбетіне қолдан келгенше тұруына бір кісідей өз үлесімізді қосайық!