Ол осы өңірде 1993 жылы қарапайым отбасында дүниеге келген. Тұрмыстағы жас бір кішкентай ханшайымның анасы. Ол No80 мектеп-гимназиясын үздік бітіріп, Абай атындағы ҚазҰПУ-дың физика-математика факультетіне физика мамандығы бойынша оқуға түсіп, 2015 жылы бакалавр дәрежесін алып шығады. Ұстаз болуды бала шақтан армандаған жас маман осы жылы қасиетті қарашаңырақ білім ордасы Жанқожа батыр атындағы No269 орта мектепке физика пәнінің мұғалімі болып жұмысқа орналасады.

Ол өз мамандығы турасында мұғалім барлық мамандық иесін тәрбиелейтін, оқытып үйрететін абзал жан. «Мұғалім мамандығы – барлық мамандықтың анасы» деп қалай дәл тауып айтқан. Мен жақсы қасиеттерді бойыма сіңірген, жақсыдан тәлім-тәрбие үйренген, бала жанын түсініп, өз пәнін сүйе білетін заман талабына сай жаңашыл мұғаліммін. Осы уақытқа дейін шәкірттерім ҰБТ-дан жоғары балл жинап грант иегері атанса, енді бір шәкірттерім аудандық, облыстық пәндік олимпиада мен ғылыми жобадан жүлделі орындар иеленіп, білім ордамыздың мәртебесін асқақтатып келеді. Ұстаздықтың ауыр жүгін арқалауды жүрегімнің қалауымен таңдадым. Сондықтан мамандығым – мақтанышым. Негізгі ұстанымым – баланы тұлға деп тану, оның пікірімен санасу, оқушының кішкентай қуанышын, табысын бағалай білу, – дейді.

Мемлекеттік бағдарламаның басты мақсаты – ауылдық жердегі маман тапшылығын қамтамасыз ету ғана емес, қала мен ауыл мектептері, аурухана, емханалар арасындағы білім беру, денсаулық сақтау қызметі сапасын арттыру. Сол үшін тәжірибелі мұғалім, дәрігерге жағдай жасау қажет. Жастар үшін жасалынып отырған осындай игі жобаның шарапатын көріп отырған жас маманның әріптестеріне өз айтары бар.

– Бағдарламаның аясында баспаналы болдым. Жастар үшін тиімдісі – бұл пайызсыз берілетін несие. Мерзімінен бұрын қайтарып, жауып тастауға да болады. Бұл жоба жас отбасы үшін жақсы мүмкіндік, – дейді ол.