ЖЕКСЕНБІНІҢ ТАҢЫ. ӘДЕТТЕ ЖҰРТ ДЕМАЛЫС КҮНДЕРІН ҮЙ ШАРУАСЫНА АРНАП, ТІРШІЛІГІН ІСТЕСЕ, ҚОЙЫН ДӘПТЕРІМІЗ БЕН ҚҰРАЛЫМЫЗДЫ АСЫНЫП САПАРҒА ШЫҚТЫҚ. БҰЛ ЖОЛҒЫ БАҒЫТ АҚТӨБЕ АУЫЛЫНДАҒЫ ШАРУАШЫЛЫҚТАРДЫҢ БІРІНЕН ЕҢБЕГІ ЕЛЕУЛІ МАМАНДЫ ЕЛГЕ ТАНЫСТЫРЫП, ҮЛГІ ЕТУ. АУЫЛҒА КІРЕБЕРІС ЖОЛҒА ТҮСІП, ЖОЛ ТҰЙЫҒЫ «ОҢТАЛАП» ШАРУА ҚОЖАЛЫҒЫНА БІР-АҚ ТІРЕЛДІК. ЖЕКСЕНБІ КҮН БОЛСА ДА МҰНДАҒЫ ТІРШІЛІКТЕ ДАМЫЛ ЖОҚ. ӘРІ-БЕРІ ЖЫЛЖЫҒАН КӨЛІКТЕР, ЖҰМЫСЫ ҚЫЗҒАН ТРАКТОР КӨРІНІСКЕ ОДАН БЕТЕР КӨРІК БЕРУДЕ. ИӘ, ЖЕРГЕ ДӘН ТҮСТІ ДЕГЕНШЕ ШАРУАШЫЛЫҚТАҒЫ БАРЛЫҚ ШАРУА – ОСЫ.

Анадайдан көлік жанында екі темірді жалғап жатқан дәнекерлеушіге көз түсіп, жанына жақындадық. Жалпы дәнекер жұмысына бұрыннан қызығушылығымыз бар-тын. Осында келген шаруамызды айтқанымызда әлгі кісінің қасындағы әріптестері іздеген адамың осы деп таныстыра кетті. Бұл осы шаруашылық құрылғалы қызмет істеп келе жатқан білікті маман, дәнекерлеуші – Алпыс Поданов. Ағамыздың осы салада жүріп, еңбек еткеніне 23 жыл толыпты. 1999 жылдан бері ауылдың шаруашылығында еңбегі сіңіп, бүгінде көпке үлгі бола білген.

– Еңбекке араласқалы бір мамандықты ұстап келемін. Арасында техника тізгіндейтінім бар. Дәнекерлеушіге жұмыс көп қой. Сынған техникаларды қайта қалпына келтіреміз, болмаса қолдан құрастырып шығарамыз. Көбіне ішкі-сыртқы жұмыстан-ақ арылмаймыз. Кейде егістіктің басында тұрып қалған техникалардың жұмысы тоқтап қалмас үшін жедел қызмет көрсетеміз. «Оңталап» шаруа қожалығында 2016 жылдан бастап қызмет істеймін. Жалпы адал еңбек ету – бәрімізге ортақ міндет. Өкінішке орай қазір жастар маңдай терін төгіп жұмыс істегісі келмейді. «Ауырдың астымен, жеңілдің үстімен» жүргенді жөн көреді. Нағыз еңбектің үлгісі – маңдайың күнге күйіп, елге қызмет еткенің. Осыны жастарға айтқым келеді, – дейді алпысты алқымдаған Алпыс ағамыз.

Ол зейнет жасқа жақындаса да өзін жеңіл әрі ширақ ұстайды. Қолынан өңделіп шыққан техника болмаса бір-біріне дәнекерленіп ұстасқан темірлер ұзаққа дейін сыр бермей қалпын сақтап тұр. Бұл туралы шаруашылық басшысы да еңбегін бағалай жеткізді.

– Алпыс ағамыздың дәнекерлеудегі жұмысы маған бала күннен таныс. Ол кісінің әрбір ісі тиянақты әрі сапалы. Сырттан көмек сұрап іздеп келетіндер де бар. Жұмыс қылып келген шаруаңды айтқызбай-ақ түсініп тұрады, – дейді шаруашылық төрағасы Хамит Аралбаев.

Дәнекерлеуші маманның қасында көп тұрмай ісіне қарап-ақ шеберлігіне көз жеткіздік. Оған артылған жұмыстың да жауапкершілігі жоғары. Ісіне кедергі келтірмейік дегендей сәттілік тілеп, біз де жөнімізбен кері жол тарттық.