Ақжар ауылында ұлттық өнеріміз бен салт дәстүрімізді дәріптеу мақсатында ауыл әкімдігі мен ауылдық әйелдер кеңесінің ұйымдастыруымен «Ұлттық өнер – ұрпаққа аманат» атты іс-шара өтті.

Тағылымы мол іс-шараға аудандық әйелдер кеңесінің төрайымы К.Раева,«Қармақшы таңы» газетінің бас редакторы С.Райымбаева, аудандық ішкі саясат бөлімінің қызметкерлері, ауыл әкімі және ардагерлер мен ауылдық әйелдер кеңесінің мүшелері қатысты.

Іс-шара көктемнің шуақты мерекелерінің бірі Қауышу күніне орай арнайы рәсіммен басталып, ұлттық тағамымыз «Наурыз көже» ұсынылып, өмір тәжірибесі мол ардагерлермен қазақ халқының салт-дәстүрлерін жастарға насихаттау, саналы ұрпақ тәрбиелеу жөнінде әңгіме өрбіді. Әрі қарай іс-шара «Қыл қалам шебері, «Он саусағынан өнер тамған» тақырыптарындағы сыр сұхбатпен жалғасып, 8 наурыз – Халықаралық әйелдер күніне орай «Жүрек жылуы» атты тренингпен қорытындыланды.

Іс-шараға арнайы келген аудандық әйелдер кеңесінің төрайымы Күлжауһар Төлегенқызы іс-шара жоғары деңгейде өткізілгендігін жеткізіп, ұйымдастырушыларға ризашылығын білдіріп, алдағы жұмыстарына сәттілік тіледі.