Айнара МАХАНБЕТОВА: "Екпе алуды дұрыс деп шештім"

Әлемге жайылған дерт әлі бә­сеңдемей тұр. Әлеуметтік желідегі ақ­параттың көр­сеткіші күннен-күнге үдей түсуде. Бірақ коронавируспен күрес те толастамақ емес. Оған қарсы вакцина да шығарылды. Жақында өз еркіммен екпе алдым. Алдын ала ережесімен таныстым.

Вакцинаның әсері аса қатты білінген жоқ. Аздап ұйқымды қысқаны бар. Температура болмады. Тамаққа деген тәбетім өзгермеді. Ертесіне де еш ауырлық сезінбедім. Қазір жағдайым жақсы, дәрігер 21 күннен кейін екпені қайта алуға келуімді айтты. Бастапқыда жақындарым екпені алуыма қарсы болды. Түбінде бәріміз екпе алатын сияқтымыз, дұрысы өздері «тегін саламыз» деп шақырып тұрғанда қазір алған дұрыс деп шештім. Бұрынғыдай мектепке барып, сабағымды беріп, шәкірттерім, әріптестеріммен арқа-жарқа болып отырғым келеді. Менен кейін де жақындарыма екпе алуға кеңес бердім. Бұл болашағымыз үшін дұрыс шешім.