Әрине, біз үшін тәуелсіздік бәрінен қымбат. Осылай аталған Президент мақаласының мәні жоғары. Себебі тәуелсіздік – ата-бабамыздың қасық қаны қалғанша жаумен шайқасып мұра еткен жерге өз ұрпағының иелік етуін қалаған асқақ арманы. Отыз жыл бұрын қазақ халқы үшін азаттықтың ақ таңы атты. Тәуелсіздікке қол жеткізгеннен кейінгі кездер де еліміз үшін оңай болмағаны белгілі. Ол кезде бала болсақ та, отбасымыздың жағдайы әлі күнге дейін көз алдымда. Отыз жылда, он жылдан кезеңдерге бөлінген тәуелсіз еліміздің тұғырын сақтап, бар қиындықты артқа тастап, дамыған елдер қатарына қосылып, елімізді әлем тани алатындай дәрежеге жеттік. Біршама белесті бағындырған еліміздің әрі қарай да көркейіп, дамуына аянбай еңбек етіп өз үлесімді қосуға әрқашан дайынмын.

Мемлекет басшысы өз мақаласында тәуелсіздікке жетіп қана қоймай, оның әрі қарай жалғасып, мәңгі жасауы үшін бүгінгі ұрпақтың білімді, өз елінің шынайы патриоты болуға үндейді. «Қуатты тәуелсіз мемлекетімізбен ғана, ұлтымыз жер бетінде сақталады» дегеніндей, ұлтымыздың мәңгі жасап, тәуелсіздіктің тұғырлы болуы үшін әрбір тұрғынның өзіне жауапкершілік алуы аса маңызды.