Ел Конституциясы – мемлекеттің Ата заңы саналады. Ол елдегі жоғары заңды күшке ие құжат. Республикадағы саяси, экономикалық және әлеуметтік тұрақтылық әлеуеті – осы Ата заң аясында жұмыс істейді. Мемлекетіміздің қазіргі ҚР Конституциясы 1995 жылы 30 тамызда бүкілхалықтық референдумда қабылданды. Иә, осылайша еліміз осыдан 23 жыл бұрын тарихи шешімін жасаған болатын. Содан бері де бас­ты заң – қоғамдық татулық пен саяси тұрақтылықтың, экономикалық даму мен демократиялық өркендеудің айшықты көрінісі болып келеді. Сонымен қоса, Ата заң – еліміздегі түрлі этностар татулығы, әрбір азаматтың лайықты өмір сүруінің, оның құқықтары мен бостандықтарына кепіл болады. Конституция – Қазақстан азаматының өмір сүруіне, сөз, дін ұстану және шығармашылық еркіндігіне, денсаулығы мен демалысына, еңбек етуіне, жеке адам ретіндегі қадір-қасиетіне нұқсан келмеуіне – кепіл. Адамзат баласы үшін өте бағалы саналатын осынау құндылықтарды сақтау – Қазақ елінің бейбітсүйгіштігін, ымырашылдығын дәлелдей түседі. Халқымыздың адамгершілік принципіне құрылған игі істері бүгінде әлем танитын, дүние мойындаған дәрежеге жетті. Бұл дегеніміз – егемендігін алған аз ғана уақытта еліміздің бүкіладамзаттық, өркениеттілік игіліктерді қамтығанын білдірсе керек. Заманында ата-бабаларымыз сыртқы күштерден қазақтың ата қонысын қорғап, ұрпақтан-ұрпаққа аманат етті. Келешек ұрпағының «қой үстінде бозторғай ұялаған» заманда өмір сүргенін қалады. Сол үшін қиын-қыстау жолдан өтіп, қилы кезеңдерді бастан өткізді. Бүгінде аталар арманы шындыққа айналып, артында қалған ұрпағы тыныш, бақытты кезеңде өмір сүруде. Ұлтарақтай жер үшін қасық қаны қалғанша күрескен ата мекенді гүлдендіріп, әлемнің маңдайалды елінің біріне жеткізу – қастерлі де қасиетті парызымыз.

Биыл қазақстандықтар Ата заңның қолданысқа енгеніне 23 жыл толған мерекесін кең көлемде атап өтеді. Бұл үлкен мереке әрі айтулы күн. Тәуелсіздік таңы аясында халқына қалтқысыз қызмет етіп келе жатқан ҚР Конституциямызды қастерлеп, қадірлеу – әрбір қоғам мүшесінің борышы.