Сыр өңірі – жыраулық өнердің ордасы. Сыр сүлейлерінің соқпағын жалғап, атадан келе жатқан төл өнердің туын көтеріп жүрген өнер иелеріне аудан әкімі Мұса Қалдарбеков жаңа жыл мерекесі қарсаңында қабылдау өткізді. Кездесуде белгілі Жиенбай жыраудың тікелей ұрпағы әйгілі жырау Арнұр Көшенейұлы мен жас айтыскер ақын Сырым Әділбеков болды.

– Қазақ руханиятының шоқтығы биік рухани саласы – жыраулық өнер. Ғасырлар бойы атадан балаға мұра болған асыл қазынамыз жыраулық өнерін жалғастырушы, ұлттық мұрамыздың насихаттаушысы, талантты өнер қайраткері ретінде үлгі болып келесіздер. Дәстүрлі додаларда бәйге төрінен көрініп, өлкеміздегі жыраулық өнерді асқақтату жолындағы ерекше үлестеріңіз үшін алғысымды білдіремін», – деді аудан басшысы.

Қабылдауда Арнұр Көшенейұлына «Қазақстан Республикасының Конституциясына – 25 жыл» мерекелік медалі мен «Алғыс хат» табыстап, сый-сияпат көрсетті. Сонымен қатар дәстүрлі жыраулық пен айтыс өнерін жалғастырып, іскер жас маман ретінде танылып жүрген жас айтыскер ақын Сырым Әділбеков алғыс хатпен марапатталды.

Кездесу соңында аудан басшысы мәдени рухани саланы дамытуда әрқашанда қолдау білдіретінін, «Жүз жыраудың елі» атанған қасиетті Қармақшы өлкесінде жыраулық дәстүрді әрі қарай жандыруда сәттілік тіледі.