Аудан әкімі ардагерлерді құттықтады
Жаңа жыл келерде адамдардың бір-біріне жақсылық тілеп, ізгі ниет білдіруі – жарасымды дүние. Осы орайда, аудан әкімі Мұса Қалдарбеков аудандық мәслихат хатшысы Марат Наятұлы, аудан әкімінің орынбасары Жарқын Омаровпен бірге қазыналы қарттардың шаңырағына арнайы барып, Жаңа жыл мерекесімен құттықтады.Еңбек ардагерлері Шакизада Ашабаев пен Назымкүл Бүркітбаеваның құтты мекеніне бас сұқққан аудан әкімі ізгі лебізін білдірді. Ол өз сөзінде еліміздің бүгінгі бейбіт заманда жеткен жетістіктері еңбек ардагерлерінің өлшеусіз ерен еңбегінің арқасында келгенін жеткізіп, олардың өмір жолдары жас ұрпаққа үлгі екендігіне тоқталды. Одан соң ел болашағы үшін тынымсыз тірлік еткен даналарға зор денсаулық пен ұзақ ғұмыр тілеп, құттықтау хат пен сый-сияпаттар табыстады.
Шакизада Ашабаев бар өмір жолын энергетика саласына арнаған, ауданымыздың «Ғасыр энергетигі» атағы берілген білікті маман. Қазіргі таңда ардақты ардагер 9 немере, 12 шөберенің ортасында ғұмыр кешуде. Ал Назымкүл Бүркітбаева апайымыз санаы ғұмырын білім беру саласына арнаған жан. Бірнеше рет облыстың, ауданының Құрмет грамоталарымен, мерекелік медальдарымен марапатталған. Оқушыға білім нәрін себе жүріп, алты перзент тәрбиелеген көпбалалы ана.Мереке қарсаңында арнайы құттықтай келген аудан әкіміне ризашылығын жеткізген еңбек ардагерлері ел игілігі үшін жасап жатқан қызметтеріне абырой тілеп, ақ батасын берді.
Расында, елдің, қоғамның бел ортасында жүріп, әртүрлі салада қызмет етіп, аудан дамуына үлес қосқан ардақты ардагерлердің еңбегі шексіз. Олардың өнегелі өмір жолы қашанда көпке үлгі.
Ардақ СӘКЕНҚЫЗЫ
Қазбек ЖАУЛЫБАЙҰЛЫ (сурет)
Қазбек ЖАУЛЫБАЙҰЛЫ (сурет)
