Қимылдаған қыр асады
Пандемияның алып келген өзгерісі көп. Соған барынша бейімделіп жатқандардың бірі – "Малике ана" мейрамханасының иелері. Кәсібін қайта бейімдеген олар бүгінде наубайхана ашқан.
Жаңа кәсіптің жұмысы күздің алғашқы айынан басталды. Қармақшының біраз дүкеніне нан өнімдерін тарататын кәсіпкер 3 адамды жұмыспен қамтуда. Мейрамхананың жұмысы тоқтаған соң жұмыссыз қалған қыз меткерлеріне наубайханадан жұмыс көзін ұсынып отыр. Олар таңертеңгі сағат 10.00 мен кешкі 22.00 аралығында жұмыс істейді. Наубайханада негізінен нан өнімдері, тәтті тоқаш пен кекстің түр-түрі дайындалады.
– Мейрамхана ісі карантин талаптарына байланысты тоқтап қалды. Ал біздің басты табыс көзіміз сол еді. Әлемді жаулап алған пандемияны жеңу әзірге мүмкін болмай тұр. Десе де тоқтап қалмай, тірлік етуіміз керек. Сол үшін біз де кәсібімізді өзгертіп, жаңаша іспен айналысуды жөн көрдік. Бүгінде балалар ойын орталығы мен осы наубайхана қызмет көрсетіп отыр. Қазір тынымсыз еңбек етіп, аудан тұрғындарын нан өнімдерімен қамтамасыз етуге жұмыс істеудеміз, – дейді Жанар Бұқпанова.
Иә, бұл наубайхананың өнімдеріне аудан тұрғындары тарапынан сұраныс та аз емес. Күн сайын жүздеген нанды дүкен сөрелеріне жеткізіп, сатылымға ұсынуда. Алайда наубайхана әзірге бір ғана пешпен жұмыс істеп тұр. Тұтынушылар қатары күн санап көбейіп жатқандықтан, алдағы уақытта бірнеше арнайы жабдық сатып алмақшы.
Аслан НҰРАЗҒАЛИ
