Ай басында аудандық сот онлайн форматта баспасөз конференциясын өткізіп, тоғыз айға қорытынды жасады. Сот төрағасы Дархан Кентбаев сот төрелігін жүзеге асыру барысында атқарған жұмысына есеп берді.

Жыл басынан бері сот өндірісінде барлығы 53 адамға қатысты 40 қылмыстық іс қаралып аяқталса, 32 қылмыстық іс бойынша 44 адамға үкім шығарылған. 7 қылмыстық іс бойынша 8 адамға қатысты қылмыстық іс өндірістен тоқтатылып, 5 қылмыстық іс медиация тәртібімен шешілген.

Ал есепті мерзімде аудандық сотта 301 азаматтық іс қаралып аяқталған. Оның ішінде 61 арыз бойынша сот бұйрығы, 139 азаматтық іс бойынша шешім шығарылған. 54 азаматтық іс бойынша іс жүргізу тоқтатылып, оның 47-сі медиация тәртібімен шешімін тапқан. Бітімгершілік келісімімен 4 азаматтық іс тоқтатылып, 62 азаматтық іс оңайлатылған іс жүргізу тәртібімен шешіліп, 10 іс соттылығы бойынша жолданған.

2020 жылдың 9 айында аудандық сотта барлығы 296 тұлғаға қатысты 296 әкімшілік іс қаралып аяқталған. Сонымен қатар «Сот кабинеті» сервисі арқылы 319 талап арыз, 304 әкімшілік іс түскен.

Пандемияға байланысты барлық істер аудио, бейнежазба, TrueConf, Zoom, Whatsapp жүйелері арқылы жүргізілген.

Онлайн баспасөз конференциясын қорытындылай келе сот төрағасы Д.Кентбаев сот жүйесі төңірегінде туындаған барлық сұрақтарға жауап беріп, алдағы уақытта сот ісін жүргізуді әрі қарай жетіле түсетінін айтты.