» » Көңілі тазаның көшесі таза

Көңілі тазаның көшесі таза

Қанға сіңген қазақы қасиетімізбен сырттан келген қонақты үйімізге бастаймыз. Ал үйге апарар жол – ол біздің көшелер. «Сырт көз сыншы» дегендей, біз мән бермеген ұсақ-түйекке олардың көзі түсуі заңдылық. Үйден бұрын көше көркін тамашалайтын қонақтан ұялмас үшін әрбір көше мұнтаздай таза болуы керек. Біз бұл арқылы оған қала, ауыл, көше тазалығын емес, өз тазалығымызды көрсетеміз.
Көшенің көрікті болуы тұрғындарға тікелей байланысты. Себебі әрбір үй олардың жеке меншігі. Өз ауласына құрметпен қарап, таза ұстайтын жанның көше келбетіне де бей-жай қарамайтыны анық. Бірлігі мен берекесі жарасқан көше тұрғындарын өзгеге үлгі ету мақсатында газет бетіне жариялап отырамыз. Өз көшесіне құрметпен қарайтындардың бір легі кент орталығындағы Қармақшы көшесінде тұрақтаған.
Ауданмен аттас көше тұрғындары әу бастан-ақ берекелі бірлігімен, ұйымдасқан тірлігімен көпті қызықтырады. Жыл сайын Наурыз мерекесіне орай ас беріп, тасаттық жасайтын. Биылғы пандемия әсерінен бұл үрдіс жалғасын таппады. Десе де, жақында ұйымшыл көше сенбілік өткізіп, көшелерін көз қызығарлықтай етіп тазалап қойды. Тазалықты ту еткен тұрғындарға сол маңайдың үлкендері Әлім Ұзақбаев пен Мұрат Қыпшақбаев сенбілік өткізу туралы бастама көтерген. Жасы үлкенді қадір тұтып, кеңесіне құлақ түргендер «Жұмыла көтерген жүк жеңіл» дегендей, ауызбіршілік танытып, бірлесе әрекет етіпті.
– Қазір дамыған заман ғой. Әрбір адамда ұялы телефон бар. «WhatsApp» желісінен көше тұрғындарына арнап чат ашып қойғанмын. Бұрынғыдай емен-жарқын көрші-көлемді араламасақ та, осы топта амандық сұрасып тұрамыз. Үлкендер көтерген бастаманы ортаға салғанымда, тұрғындар бірауыздан қолдап, уақытын белгіледік. Көшемізді көріктендіруге барша тұрғын атсалысты. Қарап тұрсақ, аса ауыр жұмыс емес. Түптеп келгенде, бәрі өзіміз үшін ғой. Жұмысқа барар, келер жолда таза көшемен жүрсек жақсы емес пе? Мұндай жұмысты жастарға үлгі етіп, тазалық мәдениетін қалыптастыру үшін сенбілікті жиі ұйымдастырып, әдетке айналдырған жөн деп санаймын. Қазір көшемізге сән кіріп, қараған сайын көңіліміз толуда, – дейді көше тұрғыны Ғабит Ыбыраев.
Расымен, сенбілік жасаушылар қатарында қолы епке келетін баладан бастап, көпке ақыл айтып жүрген дана да бар. Барлығының көксегені – көше тазалығы. Жастайынан тазалықты өзінен бастау керегін үйреніп өскен баладан күтер үміт мол. Өйткені ол кез келген жерге қоқыс тастамай, таза мекеннің құны – еңбек екенін біліп, көңілге түйіп өседі. Өз аулаңызды, көшеңізді өзіңіз тазаламасаңыз, өзге біреу оны сіз үшін істеп бермесі анық. Сол үшін тазалықты саналы түрде өз айналаңыздан бастағаныңыз абзал.
Ардақ СҮЛЕЙМЕНОВА

10 қазан 2020 ж. 1 134 0

PDF нұсқалар мұрағаты

№24 (10289)

23 наурыз 2024 ж.

№23 (10288)

19 наурыз 2024 ж.

№22 (10287)

16 наурыз 2024 ж.

Суреттер сөйлейдi

Жаңалықтар мұрағаты

«    Наурыз 2024    »
ДсСсСрБсЖмСбЖс
 123
45678910
11121314151617
18192021222324
25262728293031