ҚАЗІР ЕЛ КӨРІНБЕЙТІН ЖАУМЕН СОҒЫСЫП ЖАТЫР. ПНЕВМОНИЯНЫҢ ЖАҢА ТҮРІ – КОРОНАВИРУСПЕН КҮРЕСУ ЖАЛҒАСУДА. МАЙДАННЫҢ АЛДЫҢҒЫ ШЕБІНДЕ – ДӘРІГЕР, ПОЛИЦИЯ ЖӘНЕ СЭС МАМАНДАРЫ ЖҮР. ТӨТЕНШЕ ЖАҒДАЙ КЕЗІНДЕ ОЛАРҒА АРТЫЛҒАН ЖАУАПКЕРШІЛІК ЖҮГІ ЕСЕЛЕНЕ ТҮСТІ. ЕЛДІҢ ІРГЕСІНЕ ІРКІЛІС ТУДЫРҒАН ІНДЕТТІҢ БЕТІ ҚАЙТПАЙ, КҮННЕН-КҮНГЕ КӨБЕЮДЕ. ҚАЗІР ВИРУСҚА ҚАРСЫ БҮКІЛ ЖЕРДЕ САҚТЫҚ ШАРАСЫ ҚОЛҒА АЛЫНДЫ. ӨЙТКЕНІ ХАЛЫҚТЫҢ ДЕНСАУЛЫҒЫ БІРІНШІ ОРЫНДА. АУДАНДА КАРАНТИН ЖАРИЯЛАНҒАЛЫ БЕРІ ЭПИДАХУАЛ ТҰРАҚТАДЫ. ЕНДІГІДЕ ХАЛЫҚТЫҢ ҚҰТЫН ҚАШЫРҒАН ПАНДЕМИЯДАН АУЛАҚ ҚЫЛСЫН ДЕП ТІЛЕЙІК. БҮГІНГІ ӘҢГІМЕМІЗ ТӨТЕНШЕ ЖАҒДАЙ КЕЗДЕ ӨМІРЛЕРІН ҚАТЕРГЕ ТІГІП ЖҮРГЕН ДӘРІГЕР, ПОЛИЦЕЙ ТУРАЛЫ.

   Мылтықсыз майдан күресінде ақ халатты абзал жандардың еңбегі қашан да басым. Антына адал жандар бүгінде үй көрмей, науқастарды аман алып қалу жолында жүр. Ауданда аурудың алғашқы белгілері анықталғаннанақ инфекционист мамандар аяғынан тік тұрып қызмет етуде. Бүгінде медицина саласында жүрген бірсыпыра қызметкерлер қыл үстінде тұр. Өздеріне қауіп төнсе де өзгенің амандығы үшін соңғы сырқат айықпайынша емдеу орнында қалуда.

   Қазір төтенше жағдай уақытында дәрігерлердің жұмысы тым қауырт. Ауданда індет жұқтырғандар тіркелгеннен кейін олармен тілдесу қиындап кетті. Жағдайды білу мақсатында жұқпалы аурулар бөлімшесінің аға медбикесі Зәуреш Қарамановамен ұялы телефон арқылы байланысқан едік.

   – Мұнда коронавирус инфекциясымен тіркелген 4 науқас ем алып жатыр. Бастапқы кезде жағдайлары орташа деңгейде болды. Қазір арнайы ем қабылдау мен бақылаудың нәтижесінде денсаулықтары жақсы. Әр науқас бөлек палатаға жатқызылған. Дәрігерлер арнайы бір реттік қорғаныш киімдермен жарақталған. Инфекциялық бөлімде 15 қызметкер жұмыс істейді. Әр маман науқас қашан айығып кеткенше үйіне жіберілмейді. Тіпті бізге ғимарат ішінен шығуға да рұқсат жоқ. Отбасымызбен телефон арқылы сөйлесеміз. Балаларымыз сағынғанын айтып тауыса алмауда. Десе де мұндай жағдайға мойымай науқастың жағдайын әуелгі кезекке қоямыз. Олар дертінен айығып үйлеріне оралғанға дейінгі барлық жауапкершілік мойнымызда, – дейді ол.

   Ауданда карантин жариялаған күннен бастап полиция қызметкерлері ерекше режимге көшті. Олар кентке кіреберіс жолдағы блокбекеттерде ешкімді кіргізбей, қаққан қазықтай тігінен тік тұр. Кенттегі тәртіпті қадағалауда күндіз-түні жұмыста. Инфекция таралмау үшін тұрғындар көшеде бос сенделіп жүрмеу үшін тәртіп сақшылары апта бойы ұйқыны ұмытты. Төтенше жағдай кезінде жүріп-тұруға рұқсат қағазы барлар ғана жүре алады. Онда да жұмыстан қайтқан кезде бағытыңыздан ауытқымай үйіңізге тура баруыңыз маңызды. Ал шектен шықсаңыз айыппұл салынады. Тәртіп осылай. Карантин уақытында блокбекетте полицей қызметкерлеріне рұқсат қағазын көрсетпей, олармен тәжікелесіп тұрғандарын да жолықтырдық. Тентекті тезге салатын сақшылар тәртіп барлығына ортақ екенін түсіндіріп, жолдарынан кері қайтаруда. Түсінген адамға иә, дәл қазіргі кез «құрметті пәленше...» деп тұратын уақыт емес.

   Қармақшы ауданының уақытша ұстау изоляторының бастығы, полиция капитаны Асылбек Әлиев кіреберіс жолға блок-бекет қойылған күннен бастап осында тәртіпті қадағалайды. Сырттан кіріп шыққан көліктерді тіркеп, рұқсат қағазын тексереді.

   – Карантиннің алғашқы күнінде мұнда түсінбеушілік көп орын алды. Сырттан келгендер «азық-түлік алуға келдік немесе жұмысқа ауылдан қатынап жүрмін» дегендер көп еді. Мұның барлығын рұқсат қағазбен ғана реттеп отырмыз. Кім біледі сау адам дегеннің өзінде біреуі инфекция тасып жүруі мүмкін ғой. Сол үшін эпидемиолог мамандармен бірге жұмыс істеп жатырмыз. Көліктерді «сергек базаға» тіркеп тексереміз. Егер рұқсат берілген болса көк жанады, ал рұқсатсызға қызыл көрсетеді. Постта полиция қызметкерлері үш ауысым бойынша 12 сағаттан кезектесіп тұрады. Қазір бастапқыдай ағылған көлік жоқ, халық та түсінді, – дейді полиция капитаны.

   Қазақстанға індет келді дегеннен дәріханаларда бетперде мен антисептик тапшылығы белең алды. Болғанның өзінде адам басына шектеп, қымбатқа сатылды. Мұндай жағдайға үйренбеген халық әбігерге түсіп жан-жақтан ізденді. Осындай қысылтаяң уақытта кәсіпкерлер қолдан бетперде тігіп, халыққа тегін таратты. Қазір дәріханаларға бетперде жеткілікті жеткізілуде.

   – Халықтың қарасы бұрынғыдай сабылып бетперде іздеуден бәсеңдеді. Соның өзінде іздеп келушілер әлі де бар. Бір сатып алғанда көптеп алып кетеді. Көбіне ауылдан келгендер сұрайды. Антисептик жеткілікті. Ал бір реттік резеңке қолғаптар тез өтіп кетеді. Баға бастапқыдан төмен. Қазір қалада жол жабылғалы бетперденің жеткізілуінде іркіліс бар. Сәл шыдасақ жақын арада жеткізіледі, – дейді №5 дәріхана фармацевті Айнұр Палуаниязова.