«Мен сіз үшін жұмыста қалдым»

Қазіргі қауіпті індетпен күресу жолындағы дәрігердің еңбегі өте бағалы. Елге пандемия тіркелгелі бері олардың күнделікті өмірінде көп нәрсе өзгерді. Жұмыстары әдеттегіден екі еселеніп, тәулік бойы қызмет етуде. Ауа өткізбейтін қолайсыз қорғаныш костюмі мен арнайы көзілдірік киюге мәжбүр. Осындай қиындыққа қарамастан қызметіне адал ақ халаттылар шағым келтірместен күшейтілген режимде жұмыс істеуде. Аты жаман індет ауданда да тіркелді. Олардың хал-жағдайын білмекке аудандық аурухананың жұқпалы аурулар бөліміне хабарластық. Бірақ жұмыстың тығыздығына сай оңайлықпен тілдесе алмадық. Ас-су ішіп баптанып отыру былай тұрсын, бізбен телефон арқылы тілдесуге инфекционист Ұлықбек Абдулхамитов түн жарымда ғана уақыт тапты.

– Қазіргі уақытта өз жауапкершілігін толық түсіну дәрігерлер үшін маңызды. Үкімет төтенше жағдай жариялап, карантин енгізді. Ауданымызда коронавируспен 4 науқас тіркелді. Жағдайлары орташа деңгейде, тиісті емін алып жатыр. Олармен байланыста болғандар арнайы карантин бөлімінде және үй карантинінде. Олар да ұдайы бақылауда. Жұқпалы аурулар бөлімінде бүгінде 3 дәрігер, 6 медбике, 5 санитарлық қызметкер, 1 дезинфекция жасаушы маман, 2 сараптама алып, облысқа жіберуші медбике талмай еңбек етуде. Біз үшін бастысы – науқастардың тезірек айығып, аудан көлемінде дерттің үдемеуі. Сол үшін де барынша сақтық шараларын қолданудамыз. Жұқпалы аурулар бөлімі қызметкерлерінің барлығы ауданда алғашқы науқас тіркелгелі бері осында. Отбасымыздан жырақтап, ел үшін қызметтеміз. Соңғы науқас үйіне айығып шыққан күннің өзінде, біз 14 күндік карантинге жабыламыз. Індетке сынама тапсырып, ол теріс нәтиже бергенде ғана отбасымызға бара аламыз. Әрбір тұлға қойылған талапты толық орындап, дәрігердің жағдайына түсінушілікпен қараса, дәрігерлер үшін де жеңіл болмақ. Мен сіз үшін жұмыста қалдым, ал сіз мен үшін үйде қалыңыз! – дейді инфекционист дәрігер Ұлықбек Асқарұлы.