» » КӘСІПТЕ ДЕ КӘСІП БАР, СҰРАНЫСЫ БІР БӨЛЕК

КӘСІПТЕ ДЕ КӘСІП БАР, СҰРАНЫСЫ БІР БӨЛЕК

Өңірде кәсіпкерлікті дамыту және халықты жұмыспен қамтуда «Атамекен» ұлттық кәсіпкерлер палатасы мен үкіметтің қолдауымен «Бастау Бизнес» жобасы жүзеге асып келеді. 2015 жылдан бастау алған «Бизнес Бастау» жобасы былтыр нақты іске кірісті. Аталған жоба аясында кәсіпкерлік саласы жаңа кәсіп иелерімен толыға түсті.

– Ауданда «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға ар­налған бағдарламасының» екін­ші­ бағыты бойынша 2018 жылға жоспар­ланған 220 жұмыссыз азаматты «Бастау Бизнес» курсынан өткізу жоспарланып, үш кезеңде 123 азамат оқуға жолданса, төртінші кезеңге 40 адам тестілеуден өтті. Аудан бойынша 43 адам 146,9 млн. теңге несие алды. «Бастау Бизнес» курсынан өткен 11 адам 34 млн. теңге несиеге ие болды, – дейді жұмыспен қамту орталығының директоры Данияр Ахметов.
Бүгінде кәсіпкерлер палатасы филиалымен оқу курсынан өткен 107 жоба қорғалған. Сонымен қатар, филиал мамандарының айтуынша, «Бастау Бизнес» жобасы негізінен кәсіпкерлікті ауылдық жерлерде жандандыруға бағытталған.
– Көлік жөндеу, мал шаруашылығы, наубайхана, көлікті техникалық байқаудан өткізу жобасы өзінің өтім­ділігімен ерекшеленеді. «Бизнес Бас­тау» курсында адам жасына шектеу қойылмайды. Зейнет жасына дейінгілер бағын сынауына жол ашық. Шартына келсек: бірінші, іріктеу тестілеуден өтсе, екінші құжат тапсырады. Ал, үшіншісінде бизнестің психологиясы, бағдарламамен таныстыру, көмектері, зерттеу, салық есептілігі, заңдық құқықтары оқытылады. Содан соң барып, жоба аудандық, облыстық комиссияда қорғалады. Оның қорытындысымен жоба қаржы институтына жіберіледі. «Бизнес Бас­тау­дың» еліміздегі жұмыссыздықты азайтуға ықпалы көп. Жақында Т.Көмек­­баев ауылының тұрғыны Қадіржан Ұзынжасов, дүроңғарлық Әзімбек Нәбиев, жосалылық Азамат Сәрсенбаев, ақайлық Серік Әбсалықов, тағы басқалар жоба аясында кәсіп бас­тады. Жалпы аудан тұрғындарының ынтасы жоғары, – дейді «Бизнес Бас­тау» жобасының бизнес-тренері Айгүл Төлекова.
«Кәсіпте де кәсіп бар, сұранысы бір бөлек» демекші, бизнес ашуда идеяға назар аудару қажет екенін алға тартады жобаға қатысушылар.
– Жылжымалы техникалық орта­лық ашуға дайындық жасаудамын. Құрылғыны Жосалы кентіне қой­мақшымын. Орталық – автокөлікті сақ­тан­дырумен және техникалық байқау өткізумен айналысады. Тұтыну­шының қолына арнайы бланкі беріледі. Кәсіпкерлік палатасына алғысымды білдіремін. Курста кәсіп­ті қалай бас­тауға болады, идея таңдағанда неге мән беру керек деген сияқты тағы басқа да көптеген сұраққа жауап алдық. «Бизнес Бастаумен» кәсіп бастау – еліміздегі жұмыссыздықтың алдын алуға, адамдарды жұмыспен қамтуға септігі зор. Мен де 4 млн. теңге көлемінде 6 пайыздық несиеге қол жеткізіп, бағдарламаның игілігін көру бақытына ие болғанның бірімін, – дейді Жасұлан Мыханов.
Тұрмағамбет ауылының тұрғыны Жауқазын Оңғарқызы жоба аясында жан-жақты білім алып, 4 млн. теңге несие алды. «Ауыл шаруашылығын қаржылай қолдау қорынан» алған қаржыға Жауқазын бизнес жоспарын жасап, 12 бас бие сатып алды. Кәсіпкер бір ай бұрын жұмысын бастап та кетті.
– «Бизнес Бастаумен» мақсатыма жетуге мүмкіндік бар. Жоба барысында білмегенімді үйреніп, білімімді жетілдіре түстім. Бизнес жоспарымды комиссия алдында ойдағыдай қорғап шықтым. Болашақта жылқы басын көбейтіп, халқымыздың балдай тәтті қымызын өндіремін. Сондай-ақ, еркек тайларды бордақылап, сатуды қолға аламын, – дейді кәсіпкер.
Жуырда ғана істі бастаған кәсіпкер малын күнделікті күтіп-баптайды. Ашыл­ғанына көп болмаса да ауылдың 1 адамын жұмыспен қамтып үлгірді. «Бизнес Бастау» жобасымен кәсібін бастаған Жауқазынның алдағы жоспары ауқымды. Ол келешекте қызмет түрін көбейтіп, ауылдың өзге де тұрғындарын жұмыспен қамтуды ойластыруда.

ТҮЙІН:
Қорыта келе айтарымыз, елі­міз­дің экономикалық әлеуеті шағын және орта бизнеспен тікелей байланысты екені жасырын емес. Бұл – жұмыссыздықты азайтуда көп көмек әрі қоғам дамуында сүбелі үлес атқармақ. Соның бір парасы – «Бизнес Бастау» жобасы ауданымызда бір ізге қойылып келеді. Бір айтарлығы – жұмыссыздықты желеу етіп, екі қолды алға ұстайтындар саны азаймақ. Ал, «Бизнес Бас­тау» жобасымен білім алып, кәсіп бастағандардың кәсібі берекелі де мерекелі болсын.
Сәрсенкүл РАЙЫМБАЕВА,
«Қармақшы таңы».
25 қыркүйек 2018 ж. 219 0

PDF нұсқалар мұрағаты

№91 (9746)

30 қараша 2018 ж.

№90 (9745)

27 қараша 2018 ж.

№89 (9744)

24 қараша 2018 ж.

Оқиғалар

Көрден шыққан кемпір
05 желтоқсан 2018 ж. 428
Қабырға хикаясы

Қабырға хикаясы

13 қараша 2018 ж.

Сұхбат

АУРУЫМ ТҰМАУ ДЕМЕҢІЗ...
29 қараша 2018 ж. 94

Суреттер сөйлейдi

Жаңалықтар мұрағаты

«    Желтоқсан 2018    »
ДсСсСрБсЖмСбЖс
 12
3456789
10111213141516
17181920212223
24252627282930
31