ӨНЕР — ТӘРБИЕ БЕСІГІ: МЕКТЕП ТЕАТРЫНЫҢ ШҰҒЫЛАСЫ ШУАҚ ШАШҚАН КҮН

Т.Көмекбаев атындағы №250 мектеп-лицейінің қабырғасында руханият пен өнер тоғысқан ерекше күн болды! Магниттік мектептермен бірлесе отырып ұйымдастырылған «Мектеп театры — шығармашылық шұғыласы» атты шеберлік алаңы жоғары деңгейде өтті.

Шара шымылдығы ерекше форматта түрілді. «Самға» театрының жетекшісі Кәрібаев Шерханның ұйымдастыруымен өткен иммерсивті қарсы алу рәсімі қонақтарды бірден театрдың сиқырлы әлеміне жетеледі. Мектеп басшысы Г.Еркебаева жас дарындарға ақ жол тілеп, театр өнерінің тұлға қалыптастырудағы маңызына тоқталды.

Өнер мен шеберлік ұштасқан сәт

Оқушылар арасындағы байланысты нығайтқан «Өнер молекулалары» топтасу тренингін Кәрібаев Шерхан өткізгеннен кейін, аудандық Мәдениет үйінің режиссері Мадияр Махамбетұлының кәсіби шеберлік сыныбы басталды. Сахна тілі мен актерлік шеберліктің қыр-сырын үйренген оқушылар нағыз шығармашылық ізденіске түсті.

«Сәкен — Алаштың сұңқары»

Шараның шарықтау шегі — оқушылардың қатысуымен дайындалған «Сәкен — Алаштың сұңқары» қойылымы болды. Алаш арысының рухын сезіндірген қойылым ұстаздар мен оқушылар қауымына ерекше әсер сыйлап, көрерменнің ыстық ықыласына бөленді.

Марапат — еңбектің жемісі

Кеш соңында аудандық білім бөлімінің әдіскері Қосанова Айгүл Әлібекқызы мен мектеп басшысы атқарылған жұмысқа жоғары баға берді. Белсенді қатысушыларға аудандық білім бөлімінің басшысы Б. Жанибековтың Алғыс хаттары мен арнайы номинациялары табысталды.

Мектеп театры — бұл жай ғана қойылым емес, бұл — ұлттық кодты сақтау мен болашақ тұлғаны шыңдау алаңы. Самға, жас таланттар!