ЕГІН ЖИНАУ КЕЗІНДЕ ҚАУІПСІЗДІКТІ САҚТАЙЫҚ!
Күз мезгілі – диқан қауымы үшін жыл бойғы еңбектің нәтижесін жинайтын жауапты кезең. Егін жинау науқаны қызған уақытта алқаптарда ауыл шаруашылығы техникаларының жұмысы көбейіп, өрт қауіпсіздігіне ерекше назар аударуды талап етеді.
Егін алқаптарында өрттің шығуына көбіне техникалардың ақаулығы, электр сымдарының қысқа тұйықталуы, қозғалтқыштардың қызып кетуі және жанар-жағармайдың төгілуі себеп болуы мүмкін. Сонымен қатар, алқапқа жақын жерде темекі шегу, ашық от жағу және қауіпсіздік талаптарын сақтамау үлкен қауіп төндіреді.
Осыған байланысты егін жинау жұмыстарына қатысатын барлық техника өрт сөндіру құралдарымен қамтамасыз етіліп, техникалық жарамдылығы алдын ала тексерілуі қажет. Комбайндар мен тракторлардың қозғалтқыштары, электр жабдықтары және жанар-жағармай жүйелері күнделікті бақылауда болуы тиіс.
Жиналған астық пен сабанды сақтау кезінде де өрт қауіпсіздігі талаптарын қатаң сақтау маңызды. Астық қоймалары мен маялар электр желілерінен және басқа да өрт қаупі бар нысандардан қауіпсіз қашықтықта орналасуы қажет.
Құрметті шаруа қожалықтарының басшылары мен еңбеккерлері! Егін жинау науқаны кезінде қауіпсіздік талаптарын сақтауға жауапкершілікпен қарап, өрттің алдын алуға барынша күш салыңыздар. Бір ғана салғырттық – бірнеше айлық еңбектің нәтижесін жоққа шығаруы мүмкін.
Өрт байқалған жағдайда дереу 101 немесе 112 нөміріне хабарлаңыз.
Егіннің берекесі – еңбекте, ал еңбектің қауіпсіздігі – сақтықта!
Аудандық төтенше жағдайлар бөлімі
