Бала тәртібі – басты назарда. Қазіргі таңда қоғамда кәмелетке толмағандар арасында құқық бұзушылықтар көбейіп барады. Осы орайда С.Есқараев атындағы №27 орта мектепте аудандық білім бөлімінің ұйымдастыруымен «Кәмелетке толмағандарға қарсы жасалған қылмыстардың, ерте жүктіліктің, кәмелетке толмағандардың арасындағы құқық бұзушылықтың алдын алу және болдырмау» тақырыбында кездесу өтті.

Оған аудан прокуроры Ернұр Есетов, аудандық полиция бөлімінің жергілікті полиция қызметі бөлімшесі ювеналды полиция тобының аға инспекторы, полиция капитаны Гүлмира Исмайлова, Халықаралық «Қазақ тілі» қоғамы аудандық филиалының, аудандық әйелдер кеңесі төрайымы Күлжауһар Раева, Қызылорда облыс­тық дін істері басқармасы ау­дандық дін мәселелерін зерттеу орталығының теолог маманы Жалғасбек Ысқақов, аудандық білім бөлімінің басшысы Дастан Нәзікбаев, аудандық психоәлеуметтік кеңес беру кабинетінің дәрігері Айткүл Балмаханова, Жастар денсаулығы орталығының медбикесі Аида Жеткергеновалар қатысты. Олар мектеп оқушыларының уақытын тиімді пайдаланып, зиянды әрекеттерден аулақ болуды, құқық бұзушылықтың діни тұрғысынан түсіндіріп, жаман іске бармауға шақырды. Сонымен қатар аймақ болып төбелесудің арты жақсылыққа апармайтынын тілге тиек етіп, ауызбіршілікте болуды насихаттады.

Кездесу барысында ҚР Балалар құқықтарын қорғау өкілеттілігінің мектепішілік өкілі, 9 сынып оқушысы Қ.Әбдірайым құқық бұзушылыққа қарсы жүргізген зерттеу жұмыстарына тоқталып, өзі шығарған «Жастарға үндеу» өлеңін қатысушыларға оқып берді. 9 сынып оқушыларының құқық бұзушылыққа қарсы насихаттау мақсатында түсірілген бейнероликтері тамашаланды. Жиын соңында мектеп оқушылары сала мамандарына көкейде жүрген сауалдарын қойып, тұшымды жауаптар алды. Осындай игі іс-шаралар алдағы уақытта да жалғасын таба бермек.