Өзімізді сақтасақ, індеттен аман өтеміз

Індет жайлап, көпшілігімізді есеңгіретті. Бұрынғыдай арқа-жарқа бас қосу, емін-еркін көпшілік ортада жүру ұмыт болды. Бұл – уақытша құбылыс. Ал ол күнге жетуіміз үшін барлық сақтық шарасын қатаң сақтап, барынша ауырмайтын жол іздеуіміз керек. Босаңсуға болмайды. Себебі біз үйде отырғанда ақ халатты абзал жандар өзгенің өмірі үшін басын қатерге тігіп, үйіне оралмай, жанталасуда. Әрине, жұмыстың оңайы жоқ. Бірақ дәл қазіргі сәтте бүгінгі күннің батырлары – дәрігерлер екені даусыз. Төтенше жағдай кезінде табанынан тік тұрып, қызметке кіріскен абзал жандар әлі де тыным тапқан жоқ. Пандемиямен күресте науқастармен тығыз байланыста жұмыс істеп жүрген аудандық орталық аурухана қызметкерлерінің еңбегі ерен. Коронавирус инфекциясының дендегеніне де бірнеше айдың жүзі болды. Осы уақытқа дейін қалай сақтану керегін жаттап алатын күйге жеттік. Сол үшін барынша абай болып, кеселден аман-есен өтіп кетейік. Денсаулық өзіміздікі екенін ескерсек, қауіптің де сейілері хақ.