Қауіпті кезеңді бастан кешірудеміз

Күн сайын статистикадағы сан өзгеруде. Яғни, коронавирус жұқтырған адамдар саны көбейіп жатыр. Демек біз қауіпті кезеңде өмір сүріп жатырмыз. Сақтанбасақ біз де бұл індетті жұқтырып алуымыз әбден мүмкін.
Расымен, соңғы уақытта бейқам жүрген жандар қатары көбейді. Көшеде бетпердесіз жүріп, қауіпсіздік шаралары туралы мүлде ұмытқан. Олардың жүгенсіздігінен өзге адам індет жұқтыруда. Қазір вирустың симптомсыз түрі анықталды. Яғни, олардан ешқандай аурудың белгілері байқалмаса да өзгеге жұқтыруы мүмкін. Ал келесі адамның иммунитеті бұл ауруды көтере алмаса ше? Әрине ол жөтеледі, қызуы көтеріліп өкпесі қабынады. Ал сағатына жүздеген қоңырау қабылдап жатқан жедел жәрдем ол кісіге барып үлгермеуі мүмкін.
Міне, бір адамның бейқамдығынан өзгесі жәбір көреді. Сондықтан кеселге сенбейтіндер сақтанса игі. Біреудің жауапсыздығынан өзгеден жауап алынып жүрмесін. Бұл індеттің емі бар. Ол жауапкершілік пен бірлік. Яғни, жұмылсақ қана індетті еңсереміз.

Ербол МАТЖАНОВ,
аудандық соттың кеңсе меңгерушісі