Ол – кітап пен оқырман арасындағы алтын көпір. Оқырман үшін үлкен тәрбие мектебі, сансыз сұрақтың жауабын табуға болатын киелі орда. Кітапханадағы заманауи жобаның бірі – "Мен оқыған кітап". Бұл жобаға қатысушылардың арасынан Қармақшы ауылдық модельдік кітапханасының тұрақты, белсенді оқырманы, әдеби шығармаларды жанына серік еткен қарапайым еңбек адамы Үмбетқали Білісовты ерекше айтар едім. Ағамыз кітапханадағы әдеби, тарихи кітаптарды ерекше ықыласпен оқиды. Қазақтың көрнекті жазушылары Ә.Тарази, Б.Майлин, З.Шүкіров, Б.Мұқаев, Т.Ахтанов, Ә.Нұрпейісов, Қ.Тоқмырзин, Б.Нұржекеевтің кітаптарын оқудан еш жалыққан емес. Әсіресе С.Әбілқасымұлының "Оспан батыр", І.Есенберлиннің "Көшпенділер" трилогиясын ерекше сүйіп оқиды. Кітапханадағы мәдени көпшілік жұмыстарға да белсене араласып, оқырмандармен оқыған кітабы жайлы қызықты деректермен бөлісіп отырады.

– Қазіргі ақпараттану заманында барлық қажетті материалды компьютерден алады. Біздің балалық шағымызда қолымыз қалт етсе кітап оқитынбыз. Қызықты кітапты қолдан-қолға тигізбей кезекпен оқуға кітапханаға асығатынбыз, – дейді тұрақты оқырман.

"Оқи жүрмесең, тоқығаныңды ұмытып қаласың" деп кемеңгер тұлға Д.Қонаев айтқандай, өміріміздің аз уақытын кітап оқуға қиятын болсақ, қазақ елінің жылдам дамитыны белгілі. Оқырман – әдеби шығарманы қабылдайтын орта. Жазушы шығарманы тудырушы болса, оның қанша өмір сүретіні, әдебиетте қандай орын алатыны оқырманға байланысты. Үмбетқали Білісовтың кітап оқудағы үлгісі жас ұрпаққа өнеге. Өмірде барлық нәрсе өзгереді, тек кітапхана халық қажетіне жарап, ғасырлар бойы жұмыс істей бермек.