ӨНЕР ФЕСТИВАЛІ
Ұлыстың ұлы күні саналатын Наурыз мейрамы қарсаңында сейсенбі күні аудандық мәдениет үйінде білім қызметкерлерінің ХІІ өнер фестивалі өтті. Шараны аудан әкімінің орынбасары Е.Меңлібаев ашып беріп, қатысушы ұстаздарға сәттілік тіледі.
– Наурыз – асыға күткен, нұрын төккен мейрам. Фестивальдің жастарға арналуы да тегін емес. Жалынды, жігерлі жастарға тек табыс тілеймін, – деді аудан әкімінің орынбасары.
Биылғы фестивальдің ерекшелігі жастар жылына арналды. Фестивальде жас ұстаздар сахна төрінде әуеле ән шырқап, мың бұрала би билеп, көркемсөз оқып өзара бақ сынасты. Мұнан бөлек үлкен залда түрлі қолөнер бұйымынан ашық көрме ұйымдастырылды.
Өнер додасының қорытындысы бойынша жеңімпаздар арнайы марапатқа ие болып, облысқа жолдама алды. 28-наурызда жеңімпаздар Қызылорда облыстық Н.Бекежанов атындағы драма театрында аудан намысын қорғайтын болады.
