ЖЫРАУ МҰРАСЫ НАСИХАТТАЛДЫ
 | Қазақ әдебиеті тарихында суырып салма ақындық-жыраулық, жыршылық - қиссашылық, термешілік-әншілік өнерді бойына жиған шығармашыл тұлғаның бірі – Молдахмет Дабылұлы. Ол – ақындық пен әншілік, сондай-ақ жыршылық өнерді қатар ұстанған жыр жампозы. |
Жақында айтулы тұлғаның шығармашылығын халық арасында насихаттау мақсатында К.Рүстембеков атындағы жыраулар үйінің ұйымдастыруымен Ақтөбе ауылдық мәдениет үйінде ақын-жырау Молдахмет Дабылұлының 125 жылдығына арналған «Молдахмет – жырдың жорғасы» тақырыбында облыстық жыршы- жыраулар фестивалі өтті. Оны аудан әкімінің орынбасары Еркебұлан Меңлібаев ашып, қатысушыларға сәттілік тіледі.
Молдахмет Дабыловтың жыршылық репертуарында ірі эпикалық туынды көп. Мысалы, ол «Көрұғлы», «Мұңлық-Зарлық», «Ақтам-Сайын», «Жүсіп-Зылиха», «Қысырауын», «Қыз Жібек», «Алпамыс» дастанын күні-түні жырлайтын болған. Оның шығармашылығының негізгі арнасы – ақындығы. Ақынның лирикалық өлеңдері, дастандары, айтыстары осыны айқындайды.
Жыр фестивалінде республикаға танымал жырау Бидас Рүстембековпен бірге, Арнұр Көшеней, Берік Саймағамбетов, Амандық Бүрлібаев, Айдос Рахметов, Серік Жақсығұлов, Күнсұлу Түрікпен, Ақсұңқар Бүркітбай және басқа да жыршылар өнер көрсетіп, жырдан шашу шашты. Шарада жыршыларға Ақтөбе ауылдық округінің әкімі Орынбек Мұнарбаев, аудандық мәдениет және тілдерді дамыту бөлімінің бас маманы Еркінбек Бөрібайұлы аудан әкімінің алғыс хатын тапсырды.
Сәрсенкүл АҚКІСІ
