ӨНЕР – ҰРПАҚҚА ҮЛГІ, ЕЛГЕ МҰРА
Сырдың даңқын ән-жыр, күйімен асқақтатқан қасиетті Қармақшы елінде Көшеней Рүстембеков атындағы «Жыраулар үйінің» үйірме шәкірттерінің жылдың қорытынды концерті ұйымдастырылды. Жыр кешінің шымылдығы ұжым жетістігінен жинақталған бейне көрініспен түрілді. Одан Жыраулар үйі үшін табысты да берекелі жыл болғанын аңғардық.
Олай дейтініміз дәстүрлі жыраулық өнердің қазанын қайнатып, елдің мәдениеті мен өнерін дамытуда өзіндік үлес қосып келе жатқан Жыраулар үйінің ұйымдастыруымен Байқоңыр қаласында «Ұшқыр ойлар» республикалық ақындар айтысы, Қызылорда қаласында А.Тоқмағамбетов атындағы мәдениет үйінде Сыр сүлейі даңқты жырау Жиенбай Дүзбенбетұлының 160 жылдығына арналған «Жыр жүйрігі – Жиенбай жырау» атты облыстық жыршыжыраулар фестивалі, дәстүрлі түрде жырау Шәмшат Төлепованың құрметіне арналған «Домбырасын моншақтаған жыр жауһарлары» атты қызкеліншектердің жыр фестивалін жоғары деңгейде атап өтті.
Жыраулар үйінің шәкірттері үшін де талапты таланттарын шыңдаған жыл десек те қателеспейміз. Қызылорда қаласында өткен облыстық «Бозторғай» байқауына «Ешнияз сал» жыртерме үйірмесінің шәкірті Елдес Мәди дәстүрлі әнжыр жанры бойынша қатысып, бас жүлдені иеленіп, халықаралық «Бозторғай» байқауына жолдама алды. Сондайақ Алматы қаласында өткен халықаралық «Бозторғай – ХХVI» балалар шығармашылығы байқауында Гран при жеңіп алды.
Республикалық байқауға үздік талантты шәкірттерді дайындап, тәрбиелегені үшін «Жиенбай жырау» үйірмесінің жетекшісі Дінислам Тоқсанбаев, «Тасберген жырау» үйірмесінің жетекшісі Алмат Азаматов арнайы дипломмен марапатталған. Сонымен қатар Маңғыстау облысында өткен ҚР Мәдениет саласының үздігі, әнші, жыршы, этнограф, зерттеуші Жеткізген Сейітовтің шығармашылығына арналған республикалық жыршылар байқауына үйірме жетекшілері Руслан Өтегенов, Әлішер Мырзағалиевтер қатысып, дипломант атанған.
Талай сында топ жарған талантты шәкірт Елдес Мәди Қызылорда қаласында өткен мәслихат депутаттарының 30 жылдығы ісшарасына арнайы шақырту алса, Талант Балтабай ҚР Конституциясы күніне арналған мерекелік жиынға қатысып, өз өнерлерін ортаға салды.
Сүлейлер салған сара жолмен келе жатқан жас жыршы жырауларымызға ұлағатты ұстаз болып жүрген үйірме жетекшілері мен тұлпардай бәйгеге қосқан шәкірттері Сыр сүлейлерінің шығармаларын мақамсазда нақышына келтіре орындап, көрермендердің қошеметіне бөленді.
Іс-шара соңында Жосалы кенті ардагерлер кеңесінің төрағасы Ерболат Ұзақбаев сөз сөйлеп, «Жиенбай жырау» үйірмесінің жетекшісі, ұстазжырау Дінислам Тоқсанбаевқа «Еңбек даңқы» медалін табыстады. Жылдық есеп беру концертін қорытындылаған мекеме басшысы әріптестеріне алғысын білдірді.
– Жыраулар үйінің басты мақсаты – Сыр бойындағы тарихы тереңде жатқан Қорқыт бабамыздан бастау алатын жыраулық дәстүрді жалғастыру, қазақ халқының ұлттық өнерін өзінің құнарлы топырағында өркендету, сол арқылы ұлттық тіліміз бен ділімізді, әдебиетіміз бен мәдениетімізді байыту. Осы орайда әрбір ісшарамызда қолдау білдіріп, ғимаратымыздың жаңа кейіпке енуіне жағдай жасаған аудан әкіміне алғысым шексіз, – деді аудандық Жыраулар үйінің директоры Айгерім Ешбаева.
Мәдени ісшараға қатысқан барша ұстаз пен шәкірттер аудан әкімінің орынбасары Самат Смағұловтың арнайы алғыс хатымен марапатталды.
Ардақ СҮЛЕЙМЕНОВА
