Өнерпаздар өрге озды

Жуырда Мәдениет және Өнер қызметкерлерінің кәсіби мерекесіне арналған аудан әкімінің мерекелік қабылдауы өтті. Айналасын думанға бөлейтін, сан қырлы талантқа ие, өз ісінің майталманы болған азаматтар қашан да болса елеусіз қалмайды. Себебі, рухани байлықты дамытуда және мәдени дәстүрлердің дамуы мен сақталуына қосқан мәдениет саласы қызметкерлерінің үлесі орасан зор. Бүгінде өнеріміздің көкжиегін кеңейтіп жүрген өнер адамдары көп. Солардың бірі Зейнегүл Сүгірова, Бидас Рүстембеков, Бимұрат Смайылов, Ордабай Төребаев, Мұстахим Ахметов, Нұршат Наурызбаева, Бағия Сармолдина, Тимур Леденев, Роза Кенжеғұловаға аудан әкімінің алғыс хаты табысталып, сыйлықтар тарту етілді. Жиында мәдениет және өнер саласының қызметкерлеріне жылы лебіздер мен алғыстар айтылды. Сондай-ақ, өңіріміздің өнер саласының майталмандары әсем әнін шашу етіп, көрерменге көтеріңкі көңіл-күй сыйлады.
Артынша Шамшат Төлепова атындағы мәдениет үйінде халықтық қазынаның абыройын асқақтатып, мерейін үстем қылуға үлес қосып жүрген сала қызметкерлерінің құрметіне арналған салтанатты шара жалғасын тапты. Аудан әкімі С.Мақашов қызметкерлерді кәсіби мерекесімен құттықтап, бір топ сала мамандарына алғыс хат табыстады.
Аудан мәдениетін көркейтуде өнер майталмандарының жасап жатқан еңбегі ұшан-теңіз. Халықаралық, республикалық өнер байқауларында аудан, облысымыздың мерейін асқақтатып жүрген Малика Алдамжарова, Тоғжан Бақытова, Арай Оңғарқызы, Серік Бибімариям, Ақсұңқар Айдынұлы сынды жас таланттар болса, өнер иелерінің тәрбиесін көріп, бүгінде үлкен сахналарда жүрген айтыскер ақын Сырым Әділбеков, белгілі жас әншілер Азамат Әлтаев, Руслан Ризманов, жақында ғана өткен Кеңес Дүйсекеев атындағы республикалық әншілер конкурсының ІІ орын иегері Арайлым Мұхамбетжанова сынды жас таланттармен мақтануға болады.
Мәдениет және Өнер қызметкерлерінің мерекесіне орай ұйымдастырылған салтанатты шараның соңы аудан өнерпаздарының концерттік бағдарламасына ұласты. Өнер саласын өркендету, дәстүріміз бен салтымызды жаңғырту – елін, жерін сүйген әрбір қазақстандықтың азаматтық парызы. Мәңгілік елдің мәңгілік мәдениеті сонда ғана ғұмырлы болмақ.