Ауылдың өнегелі келіндері мен инабатты қыздары 7 кезеңнен тұратын байқауда әділқазылар қойған шарттар бойынша өзара бақ сынасты. Алдымен байқауға қатысушылар өздерін таныстырудан бастаса, одан әрі келіндер мен бұрымды қыздар өздерінің өн бойындағы өнерлерін паш етті.

Сондай-ақ, байқауда оған қатысушылар өз қолдарымен жасаған қолөнер бұйымдарын көрсетіп, сайысты қыздыра түссе, әрі қарай салт-дәстүр, әдеп-ғұрып бойынша әділқазылар тарапынан қойылған сұрақтарға жауап беріп, көрерменнің көңіл-күйін көтерді.

Шара барысында мың бұрала билеген бишілер мен тамылжыта салған әсем әнімен шашу шашқан өнерпаздар көптің көңілінен шығып, ілтипатқа бөленді.

Байқауда талапкерлер өнерлерімен ғана емес, білімділігімен, тапқырлығымен, әртістік шеберлігімен өз ойларын жеткізіп, көрермен көзайымы атанды.

Қазақ халқының салт-дәстүрін, оның ішінде қыз бен жеңге арасындағы сыйластықты паш етуге арналған сайыста әділқазылардың шешімімен І орынды Мейрамкүл Тоғызбаева мен оның қайынсіңілісі Шехризат Жарқынбекқызы жеңіп алса, ІІ орынды Гаухар Қатбаева мен оның қайынсіңілісі Гүлім Кендебайқызы, Жансая Қуанышова мен оның қайынсіңілісі Ақнұр Молдабекова иемденді. Ал, жүлделі ІІІ орынға Гүлмариям Мұратқызы мен оның қайынсіңілісі Айымжан Астамқұлова және Әсел Назарбаева қайынсіңілісі, сайыстың ең кішкентай қатысушысы Гүлназым Русланқызы көтерілді.

Сайыс соңында жүлдегерлерге ауылдық клуб үйінің дипломдары мен бағалы сыйлықтары тапсырылды.