Келіндер бақ сынады
qarmaqshy-tany.kz Аудандық Ш.Төлепова атындағы мәдениет үйінің қолдауымен Алдашбай ахун ауылдық клуб үйінің ұйымдастыруымен «Пай-пай, қазақтың келіндері» атты аймақтық келіндер сайысы өтті. Байқауға 5 келін қатысты.
Келіндер 4 кезең бойынша бақ сынады. «Мен қазақтың келіні» атты алғашқы кезеңде қатысушылар өздерін түрлі форматта таныстырса, «Әр елден келін келер, әртүрлі өнер көрсетер» атты екінші кезеңде талапкерлер жан-жақтылығын көрсетіп, өз өнерлерін ортаға салды. «Келін екен зерделі» кезеңінде қатысушыларға қазақтың салт-дәстүрі, әдет-ғұрпынан сұрақтар қойылып, білімдері сыналды. Ал «Ұлтымыздың құндылығын жалғастырушы» бөлімінде келіндер қолдан жасаған өнер туындыларын әділқазыларға ұсынды.
Сайыс қорытындысы бойынша қуаңдариялық Гүлдерай Алдабаева «Инабатты келін» атанса, көмекбаевтық Гүлсім Баданова «Зерделі келін», Алдашбай ахун ауылынан Гаухар Рақымова «Іскер келін», Тұрмағамбет ауылынан Ақбота Смағұлова «Үлгілі келін», Ақжар ауылынан Ақлимаш Әбілтаева «Өнерлі келін» номинациясын иеленді.
Барлық қатысушыға диплом мен бағалы сыйлықтар берілді.
«Қт» ақпарат
