Тіпті бір кездері «Батырлар жыры» жазылған пластинкалар да шықты. Кейде пластинка айналғанымен, ине секіріп кете берсе, оның үстіне сіріңкенің қорабын қойып, ән тыңдап, билейтінбіз. Е, ол заман келмеске кетті ғой.

Енді міне сол заманды еске түсіруге  тағы да тура келіп тұрған сияқты. Кеше бірқатар сайттар  елімізде ғана емес, төрткүл дүниеде даңқы жер жарған «Дос-Мұқасан» вокальды -инструментальды ансамблінің 1977 жылы жарыққа шыққан пластинкаларының сатылымға шығатынын жария етті. Бірақ қай жерде дейсіз ғой. Мәскеуде! Демек Кеңес Одағы мойындаған ансамбльдердің даңқы әлі жойылған жоқ.

Мәскеуде 250 данамен шығарылмақ болып отырған «Дос-Мұқасан» ансамблінің орындауында қандай әндер бар? Атап айтар болсақ, жұртшылыққа таныс «Бетпақ дала», «Ахау бикем», «Аяулым», «Ләйлім»,  «Туған жер» «16 қыз», «Куә бол», «Сұлу қыз», «Қуанышым менің» және тағы басқа әндер.

Ал пластинканың бағасы 450-500 евро доллар шамасында.