БҰЛАҚ КӨРСЕҢ, КӨЗІН АШ
“Оқу-білімсіз өнер де жоқ... өнерпаз болу үшін де, ең алдымен білім керек”
Ғабит Мүсірепов.
Қазіргі заманымыздың музыка- педогогика саласындағы үлкен проблемалық мәселелердің бірі жақсы кәсіби маман, шебер орындаушылар дайындау болып есептелінеді.
Егеменді еліміздің берік қадамы өнер саласында да үлкен өзгерістер енгізуде. Бүгінгі жастарға, өскелең ұрпаққа саяси, мәдени тұрғыда білім-тәрбие берудің сапасын көтеру мақсаты көзделіп отыр.
Мектепте ән сабағымен қатар оқушылардың музыкалық қабілетін қалыптастыруды жан- жақты жетілдіру үшін ауданымызда вокальдық дәрістер жүргізетін үйірмелер қатары жоқтың қасы. Жастарға музыкалық-эстетикалық тәрбие беруде, олардың рухани сезімін қалыптастыруда эстрадалық ән айту өнерінің алатын орны өте жоғары. Вокаль курсын оқытудың негізгі талаптары музыка мәдениетінің негізінде оқушыларды ән өнерін сүюге, вокальдық топ ұжымдарымен жұмыс әдіс-тәсілдерін сапалы түрде меңгеруге көмектеседі.
Ауданымызда эстрадалық ән салу өнеріне деген қызығушылық өте жоғары. Соның ішінде жасөспірімдер өте көп. Талабы мен таланты бар, бірақ вокальдық ережелер дауыстарына қойылмаған. Өнер саласында жүрген ауданымыздың майталмандары жетерлік. Бірақ үйірмелердің ішінде осы вокаль, яғни эстрадалық ән салу жанры бойынша дәрістер берілетін үйірме жоқ. “Сыр елі- жыр елі” осы күнге дейін қаншама өнер саңлақтарын дүниеге әкеліп, оларды жарыққа шығарды. Оларға еліктей отырып мен де өз мамандығымды таңдаған болатынмын. Алматы қаласындағы Қазақ Мемлекеттік педогогикалық университетінің “Музыка білім және мәдениет” факультетін тамамдағаныма да бес жыл толыпты. Ол жақта тағылымы мол, атақты ұстаздардан дәріс алдым. Оқуды сәтті аяқтап, “Дипломмен- ауылға” бағдарламасымен туған жерімде еңбек ету мақсатында еңбек жолымды №21 “Тоғжан” балабақшасынан бастадым. Бұл қарашаңырақ маған көп нәрсені үйретті. 2-5 жас арасындағы бүлдіршіндермен жұмыс жасау барысында мен балаға кәсіби тәрбие берудің қаншалықты маңызды, қаншалықты жауапкершілікті жұмыс екенін ұғындым. Көрсеткен өнеріне ата-анасы ризашылығын білдіргенде бір марқайып қалады екенсің. Балабақшамыздың қабырғасында тәрбиеленіп, түлеп ұшқан көптеген бүлдіршіндер қазір аудан сахынасында өнер көрсетіп жүр. Солардың бірі биыл өткен “Бозторғай” балалар байқауының қатысушысы Қарабдин Қайсар, кеше ғана білім бөлімі және “Тоғжан” балабақшасының ұйымдастыруымен 1 маусым- Халықаралық балаларды қорғау күніне орай орталық алаңда өткізілген мерекелік іс-шарада өнер көрсеткен Әбдіжаппар Аружан, “Сыр шамшырағы” атты бүлдіршіндер байқауында 1-орын иеленген Жаназар Кәусар, көрермен көзайымы атанған Экзембай Ырсалды секілді бүлдіршіндеріміздің өнері қазіргі таңда шыңдалып келе жатыр. Болашағынан зор үміт күттіретін бұл бүлдіршіндеріміз биіктен көрінетініне сеніміміз мол.
Мінекей, осы секілді өз өнерлерін шыңдай алмай жүрген бүлдіршіндеріміз бен жасөспірімдеріміз қаншама. Олардың өз қызығушылықтарын қанағаттандыру мен бос уақыттарын тиімді пайдалану мақсатында, аудандық Мәдениет үйінің жанынан “Эстрадалық ән салу” үйірмесін ашқалы отырмыз. Танымал әнші болу міндетті емес. Балғын балаларымыздың ой- санасы тек интернеттік ойындар мен әлеуметтік желілермен уланбауын, бос уақыттарын тиімді пайдаланып, музыка әлемімен бірге рухани демалуын қамтамасыз етсек дейміз.
Бүгінгі заманымыздың талабына сай эстрадалық және ұлттық өнерді меңгеріп, оны жас ұрпақтың рухани игілігіне айналдыру біздің міндетіміз.
Айкерім Қаппарқызы,
№21 “Тоғжан” ясли-бақшасының әуез жетекшісі.
