Түркістанда Қожа Ахмет Ясауи атындағы қазақ-түрік университетінің түлектері би әлемінде қанат қағып жүрген кез. Ағылшын-араб тілінен аудармашы мамандығында оқып жүрген бозбала би үйірмесі барын естіп ерекше ықылас танытады. Құрамға кіріп, түрлі шарада өнер көрсете бастайды. Арада жыл өткен соң Жазира есімді ару осы «Шауғар» би ансамбліне қосылып, бірге байқауларға қатыса бастайды. Би өнерінің әліппесімен тым ерте танысқан бойжеткен өнердің шығармашылық шыңына жетіп, көрермендерінің көзайымына айналып та үлгерді. Бір құрамда бірге жүрген екі жанның болашағы осы жерде тоғысқан. Уақыт өте ансамбльдің құрамы сирей бастайды. Жалықпай ауыл-ауылды аралап өнер көрсеткен қос ғашық мұнымен тоқтап қалмайды. «Шабыт», «Бастау» ансамблінде секілді құрамды толықтырып, өнерлі жастарды жинайды. «Өнерлі жанның өрісі кең» деген емес пе? Ел аралап, талайды тамсандырған бишілер біршама байқаудан бас жүлдені еншілейді. Бағы жанған қос ғашық қол ұстасып Қармақшыға оралады. Қазір Берік аудандық мәдениет үйінде көркемдік жетекші болса, Жазира хореограф. Алайда бала күтімінде демалыста отырған ол ауданда ұйымдастырылған концерттерге арнайы келіп өнер көрсетеді.

– Қазақта «Отан – отбасынан басталады» деген даналық сөз бар. Шынында да, адам баласы үшін Отаннан кейінгі қасиетті ұғым отбасы. Отбасы – Отанның əрбір мүшесін дүниеге əкеліп, қанатын қатайтып, қатарға қосатын маңызды мекеме. Данышпанның да, ғалымның да ең алғашқы тəлімі мен тəрбиесі осы мекемеде қаланған. Отанымыздың тұғыры мықты болу үшін Отанды құрайтын отбасы мықты болуы керек. Айналасын мейірімге толтыратын мерейлі отбасылар санынан сапасы басым түссе сол ғажап. Шүкір, екі қыздың әкесімін. Жанымда өнерлі келіншегім бар. Расын айтам, оның қатысуынсыз билей алмаймын, – дейді Берік Нұрланұлы.

Бір ерекшелігі, отағасы ұйымдастыру жағын «қатырып» қойса, Жазира сахнаға би қойылымын шығарады. Икемді, қозғалысты да өзі қиюластыра береді. Бұл бишінің тәжірибе жинақтап, енді өзінің де өзгелерге айтар ойы бар екенін көрсетеді. Мың бұралған биші жұптың алдағы уақытта кішкентай бишілерді тәрбиелеп шығатынына сенім мол. Ұлттық би өнері осылай ғана жалғасын таппақшы. Осылай ғана көрерменін сахнаға қызықтырып, мың бұралған бишілердің сиқырлы әлеміне саяхаттатпақшы.