РУХАНИ ӨМІР МӘЙЕГІ
Туған жеріміздің рухани дамуына және бай мәдени мұрамызды дәріптеуге зор үлес қосып жүрген мәдениет саласы мамандары. «Рухани жаңғыру» бағдарламасы да осы сала қызметкерлерінің белсенді қатысуының арқасында табысты жүзеге асып келеді. Халықтың көз алдында, елді ұлттық мәдениеттің қайнарына сусындатып жүрген жандар үшін шығармашылық адамына деген айрықша құрметтің белгісін сезіну ерекше бақыт.
Кәсіби мереке қарсаңында аудан әкімі Сұлтан Мақашов сала мамандарын ескерусіз қалдырмады. Аудан әкімдігінің мәжіліс залында кездесу өткізіп, ардагерлерді, мәдениет және өнер жолында қызмет жасап келе жатқан өнерпаздарды мерекемен құттықтап, алғыс хатпен марапаттады. Мәдениетіміздің қазынасына қосылған шығармашылықтарына шалқар шабыт, мол қуаныш, отбасыларына амандық тіледі.
Кітапханада қызмет етіп, зейнетке шыққан ардагер ана Бибайша Жаңахаева да сөз алып, ауданда болып жатқан оң өзгерістерге ризашылығын білдірді. Сонымен бірге, К.Рүстембеков атындағы Жыраулар үйінде «Қобыз» үйірмесінің жетекшісі, жас маман Зияда Жаңабергенова жүрекжарды тілегін жеткізіп, қобыз аспабымен шығарма орындап берсе, жезтаңдай жігіттер әннен шашу шашты.
Гүлжанат ДҮЗЕНОВА,
«Қармақшы таңы».
