Туристік саяхат
№275 орта мектеп жанындағы "Жұлдыз" жазғы тынығу лагерінің оқушылары Қармақшы ауданындағы бүкіл түркі әлемінің абызы атанған Қорқыт ата мемориалдық кешеніне туристік саяхатпен барды. Бұл шара лагерь оқушыларының ата-аналары қаражаты есебінен ұйымдастырылды. Саяхаттың мақсаты - оқушылардың рухани танымын кеңейтіп, Қорқыт Ата мұраларынан сыр тартқан мұражаймен таныстыру. Саяхат барысында, оқушылар ұстаздарының Қорқыт ата ескерткіш-кесенесінің жанына барсаңыз қобыздың дауысы естіледі деген сөзіне бұрын таң қалатын болса, енді сол үнді есітіп, көздерін жеткізді. Сондай-ақ, Қорқыт Ата мұражайының қызметкері- Мағауия ағай оқушыларды музейдегі тарихи жәдігерлермен таныстырып, Қорқыт баба, Ақсақ қыз туралы аңыз-әңгімелерді баяндап берді. Одан соң, оқушылар кешеннің "амфитеатр" бөлігінде фотосессия жасап, сурет пен видеолар түсірді. Саяхаттан соң, оқушылар лагерь тәрбиешілері ұйымдастырған эссе жазу, сурет салу сайыстарына және танымдық сағаттарына қатысты.
