САҚТЫҚ ШАРАЛАРЫН ТҮСІНДІРДІ

Жаздың басталғанына көп бола қойған жоқ. Мектеп оқушылары көптен күткен жазғы демалыстарына шықты. Демалыс маусымы ашық деуге болады. Ауданда серуен құратын саябақтар жетерлік. Дей тұра ойын алаңқайлары аз. Осы орайда аудан орталығында «Демалыс саябағы» өз жұмысын бастаған болатын. Онда балалар ойнайтын батут, катамаран, машиналар да бар.

Әрине, балалар батутпен ойнағанды жақсы көреді. Дегенмен ойнау кезінде сақтық шараларын қадағаламаса оқыс оқиғаның орын алуы ғажап емес. Жақында аудандық төтенше жағдайлар бөлімінің мамандары ойын алаңқайларында түсіндірме жұмысын жүргізді.

– Егер ауа райында қатты жел болмаса дауылдың болатыны жөніндегі дабылды ескерту түскен жағдайда ойын батуттарын құрмаған жөн. Мүмкіндігінше батутты ашық жерге орнатпау керек. Оның орналасқан жері тегіс, құрғақ болуы қажет. Батутқа ең кем дегенде 2 адам қызмет көрсетуі тиіс. Оның маңында темекі шегуге болмайды. Сонымен бірге балалардың қолсағаты, алқа мен өзге де бұйымдармен мінбегені дұрыс, – дейді аудандық төтенше жағдайлар бөлімінің инженері, азаматтық қорғау капитаны С.Абжаева.

Иә, сақтықта қорлық жоқ. Батутқа қатысты төтенше жағдайлар орын алған жағдайда жауапкершілік меншік иесіне жүктеледі. Сол себепті меншік иесіне түсіндіру жұмысы жүргізілді. Дей тұра ата-ана да баласын назардан шығармауы керек.

Ақнұр САҒЫНТАЙ,