Кәсіпкерлерге жағдай жасалды
«Нұр Отан» партиясы облыстық филиалының мәжіліс залында партияның сайлауалды бағдарламасының «Жоғары технологияларды дамыту» бағыты бойынша «Бизнестің жол картасы – 2020» бағдарламасының облыста жүзеге асырылу барысы» туралы мәселе күн тәртібіне шығарылды.
Жиынды ашып, жүргізіп отырған «Нұр Отан» партиясы облыстық филиалы төрағасының бірінші орынбасары Мұратхан Шүкеев партияның 2016-2020 жылдарға арналған «Қазақстан – 2021: Бірлік. Тұрақтылық. Жасампаздық» сайлауалды бағдарламасын іске асыру жөніндегі «Жоғары технологияларды дамыту» бағыты бойынша комиссия мүшелерінен құрылған жұмысшы тобы Жуалы мен Шу аудандарында болып, «Бизнестің жол картасы – 2020» бағдарламасының жүзеге асырылу жұмыстарына зерделеу жүргізгендігін жеткізді.
Жалпы, бағдарламаны іске асыру бойынша аймақта бірқатар жоспарлы жұмыстар атқарылған. Дегенмен кемшіліктер де баршылық. Бұл туралы партия сайлауалды бағдарламасын іске асыру жөніндегі «Жоғары технологияларды дамыту» бағыты бойынша комиссияның кураторы, облыстық мәслихаттың депутаты Абылай Сансызбай хабарлама жасады. Екі ауданда бағдарлама бойынша атқарып жатқан жұмыстары мен бірқатар кемшіліктерін тізіп шыққан Абылай Рысбайұлы алдағы уақытта орын алған олқылықтардың орнын толтыруға тынбай еңбек ету керектігін атап өтті.
Бағдарламаның жүзеге аса бастаған уақытынан бері барлық қаржы құралдары арқылы жалпы сомасы 96,8 млрд теңге бөлініп, 996 жоба бойынша мемлекеттік қолдау көрсетілген. Оның ішінде бағдарламаның «Пайыздық ставканы субсидиялау» тетігі бойынша 82,0 млрд теңгені құрайтын 841 субсидиялау келісімшарттары жасалған. Республикалық рейтингте жыл қорытындысы бойынша облыс 4-орынды иеленіпті. Партиялық тыңдауда облыс әкімдігінің кәсіпкерлік және индустриялды-инновациялық дамыту басқармасы басшысының орынбасары Жандәулет Кенжебеков «Бизнестің жол картасы – 2020» бағдарламасының аймақта атқарылып жатқан жұмыстары мен қала, аудан бойынша іске асырылуын тілге тиек етті.
– «Банк кредиттері бойынша кепілдік беру» құралының жалпы кредиттік портфелі 3362,3 млн теңгені құрайтын 284 келісімшарт жасалынды, осы келісімшарт ішінде 262 жоба субсидиялау арқылы қолдау алды, ал жиырма екісі тек қана кепілдік алды. Республикалық рейтингте 3-орынды иеленудеміз. Мемлекеттік гранттар беру бойынша 140,3 млн теңгеге 50 кәсіпкерге грант берілді. Өндірістік
(индустриялды) инфрақұрылыммен қамтамасыз ету бағыты бойынша 11,4 млрд теңгені құрайтын 83 жоба мақұлданып, жүзеге асырылуда. Банк несиелеріне кепілдік беру құралы бойынша 2010-2017 жылдар аралығында қолдау алған жобалар санына сәйкес Тараз қаласы, Шу, Талас аудандары алдыңғы қатарларды иеленіп отыр, ал Сарысу, Мойынқұм, Меркі аудандары соңғы орындарға жайғасқан, – деді Жандәулет Несіпбекұлы.
Жиында жарыс сөзге шыққан Жуалы ауданы әкімінің орынбасары Әбдікерім Үркімбаев пен Шу ауданы әкімінің орынбасары Әлихан Балқыбеков бағдарламаны іске асыруда орын алған олқылықтардың орнын толтыруға уәде етті. Басқосу соңында бірқатар ұсыныстар мен пікірлер айтылды.
