БЕЙБІТШІЛІК ПЕН БІРЛІК МЕРЕКЕСІ

Сәуірдің соңғы күні ауа райы күрт өзгеріп, суытып  сала берді. Мерекеде мамыражай көңіл-күй болмас сірә деп күдіктендік. Құдіретті қарасаңызшы. Ынтымақ пен бірлікке шақырып, татулықты ту етер айтулы датада көктен күн сәулесі мейлінше түсіп, айналаны жылылыққа бөледі де тастады. Қолына жалауша мен шар, гүл ұстаған оқушыларлек-лек болып орталыққа қарай бет алған.Көңілдері  күндей. Ұлттық киіммен сахна маңын айнала көмкерген өнерпаздар алыстан көзге түседі. Мерекелі шара әр ұлт өкілдерінің би қойылымымен шымылдығын ашты. Тұрғындар аудан әкімі Сұлтан Мақашовтың Қармақшы халқына деген жүрекжарды жылы лебізін құлақ түрді. Сұлтан Ысқақұлы өз сөзінде Бірлік мерекесі Қазақстанда тұрып жатқан барлық ұлттардың ынтымағы мен бір-біріне деген достық ықыласының, барша отандастарымыздың жасампаздығының белгісі екенін атап өтті. Сан ұлттың басын қосқан, тірлігі бірлігімен түлеген іргелі ауыл ІІІ Интернационалдың бүгінгі ахуалына тоқталып, сүттей ұйыған ауырбірлігіміздің бүлінбеуін тіледі. Егін басталды. Шаруашалардың дәннің бітік болуы үшін тер төгуге, халықты алдағы саяси науқанды белсенділікпен өткізуге шақырды. Аудандық ардагерлер кеңесінің төрағасы Қаршыға Есдәулетов те сөз алып, қой үстінде бозторғай жұмытқалаған заман мәңгі тұрақтауын тіледі.

Қабырғам алаштан, керегем ағаштан,
Өсірген қара жер, көтерген көк аспан,
Жалынды жастармыз достығы жарасқан, – деп әуелеткен әншілерге көрермен ерекше қошемет білдірді. Бірінен соң бірі айтылған әсем әнді қосыла шырқап, билеп тұрды. Жергілікті көркемөнерпаздардың концерттік бағдарламалары өзінің мазмұндылығымен, мағыналылығымен көпшілікке естен кетпес мерекелік көңіл күй сыйлады.
Бар ынта-ықыласпен шараны тамашалап тұрған тұрғындардың жанына аяңдап көңіл-күйін сұрадық.
- Жастық шағымызда 1 май – асыға күтетін мерекелердің бірегейі-тін. Міндетті түрде сол күні киімді жаңадан киетінбіз. Қыздар мерекеге арнайы көйлек тіктіртеді. 1 ай бұрын қызу дайындық басталады. Күнде орталық алаңға келіп сапта жүріп жаттығамыз. Матаға, плакатқа бидай, күріштен, бояумен «1 май», «Труд», «Мир» деп жазып, ұрандатамыз. Мінберде тұрған ел ағалары, зиялы қауым қол соғып, қошемет көрсетеді. Сондай әсерлі күн, әдемі шара бірлігімізді бұдан бетер бекемдейтіндей. Қазіргі мейрам тым өзгеше. Жаңа нақышта. Бәрі уақыттың ағамымен ғой, – дейді жастары алпыстан асқан қос құрбы Нағима Сағындықова мен Раушан Төребаева өткен шақтарын сағынышпен еске алып.
 Ақ түйенің қарны жарылған бұл күні бір шаңырақ астына өмір сүріп жатқан Қазақстан халықтарының мәдениеті мен  салт-дәстүрі әдемі жарасымын тапты. Осындай мерекелік шаралар аудандық барлық ауылдарында да аталып өтті. Мызғымас достықта ғұмыр кешіп жатқан халықтардың келешегі бұдан да баянды, мұнан да жарқын болатынына олар нық сенімді.
Туа бітті қанына ынтымақ пен татулықты серік еткен қазақтай дархан көңіл, қонақжай халық өте сирек. Атадан балаға асыл қасиет болып дарыған осы бір дәстүрдің түпкі тамырында  ел бірлігін сақтаған, ел тыныштығын күзеткен, ел мерейін өсірген шынайы көрініс бар.
Гүлжанат ДҮЗЕНОВА,
«Қармақшы таңы».
Суреттерді түсірген Қазбек ТАЙБАҒАРОВ.