Аудан əкімі С.Мақашовтың өңір тұрғындарымен өткен жылы аудан бойынша атқарылған жұмыстарды баяндауға арналған дəстүрлі есепті кездесуі Төретам кентінде жалғасты.

- Өткен жылы Төретам кентінде шағын жəне орта  кəсіпкерлікті дамыту мақсатында түрлі бағыттағы кəсіпкерлік нысандар ел игілігіне пайдалануға берілсе, бірнеше көшеге жарықтандыру жұмысы жүргізілді. Сонымен бірге, кент тұрғындары арасында саламатты өмір салтын қалыптастыруда жəне жастарды спортқа баулуда заманауи үлгідегі  денешынықтыру-сауықтыру кешені іске қосылса, кенттегі Аманкелді көшесіндегі ластанған аумақ тазаланды. Қорыта айтқанда, өткен жыл ел мүддесіне арналған басқа да ілікімді істермен айшықталды,- деді Төретам кентінің əкімі Шайхыбек Сүйеуімбетов.

Кездесуде аудан əкімі Сұлтан Мақашов  өңір бойынша жүзеге асырылған жобалар мен Мемлекет басшысының сара саясатын жүзеге асыруда атқарылып жатқан жұмыстарды саралады. Сонымен қатар,  Төретам кенті тұғындарының тұрмыс-тіршілігін нығайтуға мақсатталған жұмыстарды зерделеп, жоспарлар жайына тоқталды. Есепті жиында кент тұрғындары Əбумүтталап Ниязбаев, Əділбек Өтебаев, Əмидулла Нағыметов көшелерді жөндеу,  кентті абаттандыруда жіберілген олқылықтар, кентті табиғы газбен қамтамасыз ету сынды сауалдарын көтеріп, мамандар тарапынан өз дəрежесінде берілген жауаптар алды.