Әз пайғамбарымыз Мұхаммед (оған Алланың игілігі мен рахымы болғай) григориан күнтізбесі бойынша 571-жылдың 20-сәуірінде қасиетті Мекке қаласында дүниеге келді. Әкесі Абдулла пайғамбарымыз туылмастан бұрын көз жұмса, анасы Әмина 6 жасында қайтыс болады. Хақ Тағала пайғамбарлыққа лайықты көрген сүйікті құлын күллі жамандық атаулы мінез-құлықтардан сақтап, тиісінше адамгершілік, мейірімділік, сенімділік, адалдық секілді қасиеттерді бойына дарытқан. Пайғамбарлық келгенге дейін-ақ меккеліктер арасында «Мухаммадул Амин», яғни сенімді Мұхаммед деген құрметті атаққа ие болған. Кісіліктің кемел тұлғасын қалыптастырған таңдаулы құлына 40 жасында иләһи илхам – алғашқы уахи түсіріп, қасиетті Құран нұрына бөледі. Осылайша жер бетіне ақиқат дін – Ислам нұры тарала бастады. Алла Тағаланың жаратқан құлдарына деген сүйіспеншілігі мен мейірімі соңғы елші Мұхаммед (оған Алланың игілігі мен рахымы болғай) пайғамбардың бүкіл әлемдерге рахым етіп жіберілуімен бастау алды. Бұл жайында Алла Тағала «Әнбия» сүресінің 107-аятында: «Біз сені бүкіл әлемге рахым етіп қана жібердік», – деп сүйіншілейді.Біз иман келтіргенде «Алладан басқа тәңір жоқ, Мұхаммед Алланың елшісі» деп сенеміз және куәлік етеміз. Демек, Алла Тағалаға сеніп, оны ұлықтаудан кейінгі міндетіміз – үмметтің ұлы ұстазы һәм жанашыры пайғамбарымызды ардақтап, сүннетін бекем ұстанып, оған деген сүйіспеншілігімізді арттыру. Пай­­ғам^­­барымыз Мұхаммед (оған Алланың игілігі мен рахымы болғай) бір хадисінде: «Мен көркем мінезді кемеліне келтіру үшін жіберілдім», – деген. Олай болса ата-бабаларымыз ардақтап, кие тұтқан пайғам­барымыздың хадистерін әрбір ісімізде басшылыққа алып, оған еліктеу, үлгі тұту, оны келер ұрпаққа насихаттау мұсылмандық абыройлы борышымыз.
Ал, енді мәуліт мерекесін атап өту жөнінде көрнекті Ислам ғалымдарының айтқандарына тоқ­та­лар болсақ, Хасан әл-Басри: «Менің Ухуд тауындай алтыным болса, оны Алла Елшісінің мәулітін оқытуға жұмсар едім», – десе, Жәләлуддин Суюти: «Бір үйде немесе мешітте пайғамбарымыздың мәуліті оқылса, сол үйдің немесе мешіттің адамдарын періштелер орап алады, олардың барлығына Алла Тағаланың рахымы болады және олар нұрға бөленеді. Себебі, періштелер пайғамбарымызға мәуліт оқығаны үшін ол адамға салауат айтып тұрады». Демек, Мәуліт айында сауапты амал көп жасап, пайғамбарымызға деген сүйіспеншілігімізді арттырар болсақ, шексіз сауапқа ие болатынымыз ақиқат. Яғни, үстіміздегі мәуліт айларында үйді-үйлерде пайғам­бары­­мыздың құрметіне дастархан жайы­лып, оған ағайын-туыстар шақы­рылып жатса сауапты да ғибратты іс. Әрине, ондай жиындарда пайғамбар өмірінен өнегелі өрнектер мен хикметті хадистер айтып, көбірек салауат айту Мәуліт дастарханының мәні мен сәні. Осындай ұлы күндердің құрметіне жетім-жесірлер мен жарлы-жақыбайларға көмек қолын созып, өскелең ұрпаққа пайғамбар есімімен қатар, тәрбиеге толы ғибратты ғұмырын насихаттау оның атына салауат айтуды үйрету – бүгінгі мұсылман үмметінің атқарар сауапты амалы.
Қасиетті Отанымыз – Қазақстан Тәуелсіздік байрағын желбіреткелі әлім­сақтан мұсылман халқымыз асыл дінімізді дамытып, ата-бабаларымыз дәріптеп кеткен, кейінгі ұрпаққа берері мол діни мерекелерімізді қайта жандандырып келеді. Солардың бірі – Ислам әлемінде айшықты орны бар Мәуліт мерекесі. Діни мерекелер мен құлшылық уақыттары мұсылманша күнтізбемен есеп­телетіндіктен биылғы жылы Мәуліт мерекесі қараша айының 19-жұлдызы, дүйсенбіге сәйкес келіп отыр.
Қадірменді ағайын! Тау тұлғасы тәр­биеге толы, салиқалы өмір жолында үмметіне үлгі-өнеге калдырған Мұхаммед (оған Алланың игілігі мен рахымы болғай) пайғамбардың туылған күні – Мәуліт мерекесі құтты болсын! Алла Тағала елімізге амандық, әрбір отбасыға бақ-береке беріп, ұрпағымыздың иманды да тәрбиелі болып өсуін нәсіп еткей!