ОРАЗАНЫҢ ПАЙДАСЫ

Біле білгенге оразаның пайдасы жетерлік. Денсаулық жағынан келгенде күйзелістен сақтайды, күш-қуатты арттырады, есте сақтау, зерде қабілетінің жұмысын жақсартады. Жаңа клеткалар пайда болып, ағза жасарады. Бүйрекке, өтке құм-тас жиналудың алдын алады. Төзімділікке, сабырлылыққа, қанағатшылдыққа үйретеді.
Рухани жағынан адам баласы Алла Тағаланың ризашылығына бөленгісі келеді. Мейірімін, қамқорын күтеді. Өмірге сеніммен, үмітпен қарауға мүмкіндік алады. Адалдық пен саналылықты жанына серік етеді.
Бірде ораза ұстаушы Ома Бухлер: «Ораза тұтушының қарны ашпайды, аштық жариялаушы ашығады» деген. Шетелдік дәрігер Гелмут Лутзнер өзінің әйгілі «Ораза арқасында өмірге қайта келу» кітабын жазған. Мұнда ол: «Алғашқы ашығу-емделу сеанстары, зиянды заттардың денеден бөліну сағаты» деп атап көрсеткен.
Шындығында Алла Тағала хақ. Мұсылман қауымының сүйенері де ұлы қамқоршысы бір Жаратқан иеміз. Ол Ұлық. Серігі жоқ. Туылмады да, тумады. Бұл тұрғыда Пайғамбарымыз (с.ғ.с.): «Кімде-кім ораза тұтса және Алла ризалығы үшін шын ықыласымен мақтанбай тараух намазын оқыса, Алла Тағала оның тіршіліктегі күнәларын жаңа туғандай тазартады», – деп өсиет еткен.
Ораза айы мүбәрәк болсын, ағайын!