2018-2020 жылдар облысымызда Жаппай кәсіпкерлікті дамытудың үш жылдығы деп жарияланды.
Бұл кезеңде шағын және орта кәсіпкерлікті дамытуға басымдылық берілетіні сөзсіз.
Қармақшы ауданы бойынша биылғы жылы 3385 кәсіпкерлік субъектілер тіркелген. Бұл көрсеткіш өткен жылмен салыстырған 5,6 пайызға жоғары.
Осы ретте, ауданымыздағы жаппай кәсіпкерлікті дамыту бағытында мемлекеттік бағдарламалар арқылы қолдау көрсетілуде.
«Бизнестің жол картасы - 2020» бизнесті қолдау мен дамытудың бірыңғай бағдарламасы шеңберінде несиелендірудің пайыздық ставкасын субсидиялау және ішінара кепілдендіру бойынша жыл басынан 7 жоба 122,7 млн теңгеге несиелендірілді. Сонымен қатар, екінші деңгейлі банктердің қарауына жалпы құны 544,8 млн.теңге болатын 5 жоба ұсынылды.
«Бизнестің жол картасы - 2020» бағдарламасы шеңберінде гранттар беру бойынша 33 жобаға 23,2 млн.теңге бөлінді.
«Микробизнес Қызылорда» бағдарламасы шеңберінде «Қызылорда» Өңірлік инвестициялық орталығы» ЖШС-нен 22 жоба 62,9 млн теңгеге несиелендірілді.
Сонымен қатар, «Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған бағдарламасы» аясында жыл басынан бері барлығы 69 жоба 217,8 млн.теңгеге қаржыландырылды.