«Ата кәсіп –алтын мұра»

Қызылорда қаласында еңбек күні мерекесі қарсаңында «Ата кәсіп –алтын мұра» атты V облыстық еңбек сабақтастығы форумы өтті. Форумды ашу барысында Қызылорда облысының әкімі Қырымбек Көшербаев: «Елбасының Жарлығымен бекітілген «Еңбек күні» мерекесін биыл бесінші рет атап өтіп отырмыз. Осы уақыт аралығында кәсіпті атадан балаға мирас етіп отырған қаншама отбасыларды облыста ғана емес, республика көлемінде таныта білдік. Біздің бүгінгі жас ұрпағымыз ата кәсіпті жалғастырып, оның қыр-сырын отбасынан үйренсе, әрі қарай жалғастырса, мұның өзі бір тәрбие мектебі емес пе? Соның нәтижесінде өздеріңіз сияқты еңбек әулеттері қалыптасып жатса, бұл да бір ұлтымыздың рухани жаңғыруы болмақ», - деді.
«Қармақшы ауданынан Назарқұловтар әулеті ішкі істер саласы бойынша үздік шықты. Әулеттің саладағы еңбек өтілі – 74 жыл. Әулет үлкені Есет Камаладинұлы ішкі істер органдарының подполковнигі, сала ардагері, еңбек өтілі – 27 жыл»,-деп атап өтті салтанатты іс-шара жүргізушісі. Ақсақал – Қармақшы аудандық Ішкі істер бөлімі ардагерлер кеңесінің төрағасы запастағы полиция подполковнигі Назарқұлов Есет Камаладдинұлы 1975-2002 жылдар аралығында жұмыс істеп, Қармақшы ауданы Ішкі істер бөдімінің Кадр жұмысы бөлімі бастығының орынбасары лауазымымен зейнетке шыққан.
Осы әулеттің кіші ұлы, Қармақшы ауданы Төтенше жағдайлар бөлімінің бас маманы азаматтық қорғау майоры Назарқұлов Еркін Есетұлы 2003 жылдан бері төтенше жағдай саласында қызмет атқарып келеді. Отбасылы, 4 баланың әкесі ретінде балаларына қамқор. Жан-жары Тайшықова Ғазиза №250-мектеп-лицейінің мұғалімі болып еңбек етеді.
Осы әулеттің бір ұлы - Қармақшы ауданы Ішкі істер бөлімінің запастағы полиция майоры Назарқұлов Нұрбол Есетұлы 1994-2016 жылдар аралығында жұмыс істеп, Ішкі істер бөлімінің жедел кезекшісінің бастығы лауазымымен зейнетке шыққан.
Осы әулеттің тағы бір ұлы – Қармақшы ауданы Ішкі істер бөлімінің жергілікті полиция қызметі бастығының орынбасары полиция подполковнигі Назарқұлов Ерлан Есетұлы 1999 жылдан бері абыроймен қызмет атқарып келеді.
Бұл әулеттің қызмет жолында алған марапаттары да жеткілікті. Әулеттің әкесі – Есет Назарқұлов 2001 жылы «Ішкі істер министрлігінің еңбек сіңірген қызметкері» омырау белгісімен марапатталған. Әулеттің ұлдары қызмет еткен жылдары мақтау қағаздары мен медальдармен марапатталып отырылған. Олардың ішінде отбасының кіші ұлы, біздің әріптесіміз - Қармақшы ауданы Төтенше жағдайлар бөлімінің бас маманы Е.Назарқұлов 2012 жылы «ІІІ дәрежелі «Өртке қарсы қызмет органдарындағы мінсіз қызметі үшін»» медалімен, 2015 жылы «Байқоңыр ғарыш айлағына 60 жыл» естелік белгісімен, 2018 жылы «Өртке қарсы қызметіне 100 жыл» естелік медалімен марапатталды.
«Осындай жарасымдылығы жарасқан ұлағатты жанұялар елімізде көп болсын, кейінгі ұрпақ сабақтастығы жалғассын» деген ізгі тілек көкейде тұратыны кәміл. Назарқұловтар отбасысына алдағы уақытта да бақ-береке тілейміз.