Оқу жылына дайындық пысықталды

– Бүгінде өңірімізде аудандық білім бөліміне қарасты 28 жалпы орта білім беретін, 1 негізгі мектеп, 3 мектептен тыс және 36 мектепке дейінгі білім беру мекемесі жұмыс істейді. Мектепке дейінгі білім беру ұйымында бүгінде 442 педагог-қызметкер еңбек етеді. Өткен 2017-2018 оқу жылында балабақшада 2823 бала тәрбиеленді. Бір ескерерлігі, аудан бойынша үш ауысымдағы мектеп жоқ. Сондай-ақ, білім беру ұйымдары қажетті материалдық-техникалық базамен жабдықталған. Білім ұяларында 1907 мұғалім шәкірттерге саналы тәрбие, сапалы білім беруде. Жаңа оқу жылында 14255 оқушы білім нәрімен сусындамақ, – деді аудандық білім бөлімінің басшысы Ж.Омаров.

Бүгінгі жаһандану кезеңінде білім бағасының бәсі бәрінен жоғары тұр. Бұл тұрғысында Мемлекет басшысы Н.Назарбаев қазақстандықтарға жолдаған «Төртінші өнеркәсіптік революция жағдайындағы дамудың жаңа мүмкіндіктері» атты Жолдауында айқындап берген болатын. Осы ретте, мектептердің материалдық-техникалық базасын жақсарту мақсатында былтырғы оқу жылында робототехника кабинеттерімен №80, №105, №250 мектептер мен аудандық оқушылар үйі жұмыс жүргізсе, үстіміздегі оқу жылында аталған кабинеттер 10 мектепке берілмек. Сондай-ақ, білім саласындағы басты мәселенің бірі – оқушыларды оқулықпен қамтамасыз ету. Аудандық білім бөлімі басшысының айтуынша, 2018-2019 оқу жылына жаңартылған білім беру бағдарламасы бойынша 3,6,8-сыныптарға оқулықтар, 1,2-сыныптарға оқушы дәптері және 1-сынып оқушыларына Елбасының «Менің Отаным – Қазақстан» атты оқу құралына қажетті қаржы бөлінген. Айта кететін жайт, Байқоңыр қаласындағы №275 орта мектеп пен Төретам кентіндегі №269 орта мектепте инклюзивті сыныптар ашылмақ. Мұнан өзге, ата-ана мен мектеп ұжымы үшін оқушы тасымалы мен олардың ыстық тамақпен қамтылуы да қолға алынуда. Алдағы уақытта №1 маршрут, №183 мектеп көшесіне қарай жүруінің схемасын сызуды қолға алмақ. Сондай-ақ, аудан әкімінің орынбасары Ә.Қошалақов аудандық кәсіпкерлер палатасының директоры А.Шоқбаровқа баға тұрақтылығын қамтамасыз етуді тапсырды. Яки, оқу-құралдарының қымбаттамауын басты назарға алды.

Сондай-ақ, екінші мәселе аудандағы әлеуметтік нысандардың жылу беруі жайында қозғалды. Аудан бойынша 2 кент, 12 ауылдық округте 120 әлеуметтік нысан орналасқан. Білім саласы 57 нысан, мәдениет саласы 35 нысан, спорт саласы бойынша 7 нысан, денсаулық саласы бойынша 21 нысан, Байқоңыр қаласындағы 5 орта мектеп пен 1 балабақша сұйытылған газбен жылы­тылады. Мамандардың мәліметіне сүйенсек, №185 және №186 орта мек­тептің бу қазандықтарын сұйытылған газге ауыстыру мақсатында жобалық сме­талық құжаттамасын рәсімдеп, ведомстводан тыс сараптамадан өткізуге қаржы бөлініп, әлеуетті өнім беруші «Берекет Проект» ЖШС тарапынан сме­талық құжаттамасы рәсімделіп, жоба сараптамадан өткізілуде.

Алқа отырысында қаралған мәсе­лелер бойынша білім беру ошақ­тарының жаңа оқу жылына толықтай дайын болуын, барлық балабақша, мектеп, клубты жылумен қамтамасыз етуді, сондай-ақ, мектепке автобус тасымалдауы жайында нақты тапсырмалар берілді.