АҚЫН МҰРАСЫ НАСИХАТТАЛДЫ
Жақында Елбасының «Болашаққа бағдар: рухани жаңғыру» БАҒДАРЛАМАЛЫҚ мақаласы аясында аудандық тарихи-өлкетану музейінде белгілі жыр жампозы, айтыскер ақын әрі ұлағатты ұстаз Мұхамедқали Шыңғысовтың туғанына 90 жыл толуына орай «Тұғыры биік тау тұлға» тақырыбында көрме өтті.
Оны музейдің ғылыми қызметкері Т.Өтегенова ұйымдастырды. «Қармақшы ауданының құрметті азаматына» арналған көрмеге ақынның көзі тірісінде қолданған бұйымдары: жайнамаз, қол сағаты, көзілдірік, қаламсап, марапаттары, тағы басқа заттары қойылды.
– М.Айдынәліұлының шығармашылығымен тағы бір қауышқаныма қуаныштымын. Әсіресе, өзі тұтынған заттарын көру мен үшін ғанибет. Халқымызда: «Ақынның – екі ғұмыры болады» деген сөз бар. Ақын ағамыздың екінші – шығармашылық ғұмыры өзінің туып-өскен халқымен мәңгі бірге жасай береді, – дейді Тұрмағамбет ауылының тұрғыны Мұрат Алдамұратов.
Расында да, талайды от ауыз, орақ тілімен тәнті еткен ақын ағаның шығармасы халқының рухани қазынасына өз үлесін қоса береді.
Сәрсенкүл ЖАУДАТБЕК
