«Сот кабинеті»- тынымсыз ізденістің жемісі

Жаңа технологияларды қолдану сот жұмысын айтарлықтай жеңілдетті. Заманауи құрылғыларды қолданудағы алғашқы нәтижелердің дұрыстығы ескерілгендіктен, мемлекет басшысының ұлт жоспарында да, республика судьяларының 7 съезінде де сот төрелігіне қолжетімділікті арттыру, ашықтық, жариялықты қамтамасыз ету үшін жаңа технологиялардың қолданасын кеңейтуге тапсырма берілген болатын. Көпшілік сенімінен шыққан жобаның бірі - «Сот кабинеті» электрондық сервисі.

2014 жылдан бастап, қолданысқа енгізілген бұл қызметті де жұртшылықтың бірден қабылдай қоймағаны рас. «Сот кабинеті» арқылы арыз-шағым берудің реті қанша тәптіштеп түсіндірілсе де, кейбір азаматтар жаңа жобаға сенімсіздік танытты. Алайда, заманауи технологиялардың жетістігін тұрақты насихаттаудың нәтежесінде «Сот кабинеті» сервисі қазір ең көп қолданылатын, халық сенетін жобалардың біріне айналды. Қаншама түсіндіру жұмыстары жүргізілді. Халыққа қызмет көрсету орталықтарына арнайы барып сервиспен жұмыс істеу жолдары іс жүзінде көрсетілді. Бұған қоса, бұқаралық ақпарат құралдарында «Сот кабинетін» насихаттау жұмыстары жүргізіліп түрады.

«Сот кабинетін» қолдану қиындық тудырмайды. Сервис арқылы әрбір азамат өзіне қолайлы кез келген уақытта үйінен, кеңсесінен шықпастан, интернет желісі арқылы арызды /өтінішті/ шағым немесе наразылықты электрондық түрде жолдай алады. Сонымен қатар, бұл сервис азаматтарға мемлекеттік бажды онлайн режимде төлеу, сот құжатын, сондай-ақ, істің орындалуы деңгейін көру және сот актісін басып шығару, процессуалдық мерзімдерді қадағалау секілді көп мүмкіндікті ұсынады. Ол үшін азаматтардың арнайы электронды цифрлы қолтаңбаны иеленіп, интернетке қолжетімділігі қамтамасыз етілсе болғаны.

2017 жылдың Статистика мәліметіне сүйенсек, Қармақшы аудандық сотына «Сот кабинеті» сервисі арқылы 695 азаматтық іс түскен. Уақыт өткен сайын «Сот кабинетін» пайдаланушылар қатары өсіп келеді. Ең бастысы, «Сот кабинетін» қолдану сот кеңсесі қызметкерлерінің ғана емес, сотқа жүгінген адамдардың да уақыты мен қаржысын, бюджет қаржысын үнемдеуге зор ықпалын тигізіп отыр.