АҚМОЛА ТӨРІНДЕ ӨТКЕН РЕСПУБЛИКАЛЫҚ СПАРТАКИАДАДА ЖЕРЛЕСТЕРІМІЗ ЛАЙЫҚТЫ ӨНЕР КӨРСЕТТІ
2026 жылдың 8–18 шілде аралығында Ақмола облысының Көкшетау қаласында жергілікті атқарушы органдар қызметкерлері арасында дәстүрлі республикалық спартакиада өтті. Еліміздің барлық өңірінен жиналған мемлекеттік қызметшілер спорттың бірнеше түрінен сынға түсіп, өз өңірлерінің намысын қорғады.
Аталған республикалық додада Қызылорда облысының құрамасы сапында Қармақшы ауданынан Дауылкөл ауылдық округінің әкімі Сабырхан Зайыров пен Қуаңдария ауылдық округі әкімі аппаратының бас маманы Алмат Жалғасбаев ұлттық спорттың төл ойыны – тоғызқұмалақтан бақ сынады.
Тартысқа толы жарыс қорытындысы бойынша Қызылорда облысының құрамасы 18 команданың ішінен VII орынды иеленді. Бұл нәтиже – жерлестеріміздің кәсіби шеберлігі мен ұлттық спортқа деген құрметінің, табандылығы мен жауапкершілігінің айқын көрінісі.
Жерлестерімізді республикалық деңгейдегі айтулы жетістіктерімен шын жүректен құттықтаймыз! Алдағы жарыстарда да биік белестерді бағындырып, ауданымыздың және өңіріміздің мерейін асқақтата берулеріне тілектеспіз.
